شبكة مراغه الأصاله والتاريخ



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

شاطر | 
 

 أملأ الأماكن الخالية (مع الحلول)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
منير على طه
 
 


الموقع : السودان
عدد المساهمات : 707
تاريخ التسجيل : 06/09/2010

مُساهمةموضوع: أملأ الأماكن الخالية (مع الحلول)   الخميس 09 ديسمبر 2010, 7:16 pm

 

أملأ الأماكن الخالية (مع الحلول)

 

الكاتب الساخر

السؤال الأول : يحتاج الخريج  إلى .......................... كى يمكنه الزواج

1-         16 سنة ضوئية

2-         24 سنة شمسية

3-         12 سنة قمرية

4-         كل الإجابات أعلاه غير صحيحة

 

 الإجابة :

الإجابة الرابعة هى الصحيحة وهى أن كل الإجابات أعلاه غير صحيحة لأنو لو قلنا إنو الخريج ده لقى ليهو شغل وكان محظوظ والله يا استاذ عشروميت ألف سنة (ضوشمرية) ما يقدر يعمل فيها حاجه لأنو ماهيتو ما ح تكفيهو شاى ومواصلات وبعدين بالله قول قدر يعرس أها أولادو الح يجيبهم ديل ياكلو (نيم) !

 

السؤال الثانى : تمتلئ الشوارع بالعربات الفارهة التى كتب على لوحاتها كلمة .....................

1-     إستنكار

2-     إستحمار

3-     إستغفال

4-     إستثمار

 

الإجابة :

أنا بفتكر الإجابة نمرة تلاته هى الإجابة الصحيحة .. البلد كووولها إتملت عربات من النوع ده ... أى زول جاء فتح ليهو محل (شاورما) وبيرقر  وطعمية وعمل فيها مستثمردخل ليهو كم عربية  وهاك يا تسهيلات ! بالله يا أستاذ هو هسه لو فى إستثمار حقيقى مش كان وفر ليهو  فرص عمل للشباب العاطل ده؟

 

السؤال الثالث : تذهب الفنانات السودانيات إلى نيجريا من أجل ..................................

1-     مشاهدة الآثار السياحية

2-     مشاهدة الأفلام الروائية

3-     مشاهدة العروض المسرحية

4-     كل الإجابات غير صحيحة

 

الإجابة :

الإجابه الصحيحة يا أستاذ هى الإجابه رقم أربعة الأخيرة دى عشان كل الخيارات الذكرتها دى غلت والفنانات ديل لمن يرجعوا ما بقولو شافو آثار سياحية ولا عروض مسرحية كوووولهن بيقولو شافو حاجه إسمها (الشريف) وهو (مبسوط) منهن ! أها الشريف ده يطلع شنو؟ ومبسوط ليه؟ السؤال ده حقو تسألو للحكومة مش الحكومة بتعرف أى حاجه؟

 

السؤال الرابع : إن كان مرتبك يكفيك حتى نهاية الشهر فأنت بلا شك .................

1-     وزير

2-     والى

3-     حاوى

4-     كل الإجابات صحيحة

 

الإجابه :

كل الإجابات صحيحة يا أستاذ الوزراء والولاة المسئولين مرتباتهم بتكفيهم لحدت آخر الشهر والمواطن (الحاوى) كمان مرتبو بيكفيهو لدت آخر الشهر هو لو ما كان (حاوى) بجد يمون مرتبو خمسميت جنيه ومؤجر بى خمسمية !

 

السؤال الخامس : أصبحت المستوصفات الخاصة أداة من أدوات الـ ...............

1-     الجر

2-     الجزم

3-     الرفع

4-     النصب

 

الإجابة :

الإجابات كووولها يا أستاذ صحيحة .. ناس المستوصفات الخاصة (يجرو) المريض بالإعلانات .. بروفيسور منو وبروفيسور منو واحدث جهاز لرسم الشنو و(يجزمو) للمريض إنو ح يلاقى رعاية طبية ما حصلت

وإنهم لا محالة ح (يرفعو) عنو البلاء والمرض لكن المواطن فى الأخير يكتشف إنو ده (نصب) سااااكت

 

السؤال السادس : رؤساء الأحزاب السودانية يجب أن يدخلوا إلى ............

1-     دار المسنين

2-     دار العجزة

3-     دار فلاح

4-     موسوعة جينيس

 

الإجابة :

دار فلاح دى ما أظن يدخلوها عشان ما عندهم وكت للغناء والكلام ده ومشغولين بمشاكل المواطنين وكمان دار المسنين والعجزة دى برضو ما أظن (مع إنهم مسنين وعواجيز) عشان الناس دى ما شاء الله قاعدة فى (الملك) بتاعا لكن (موسوعة جينيس) دى حقو يدخلوها بى أوسع أبوابا !! شغالين ستين سنة (ولسه) بس سياسة !!

 

السؤال السابع : تكون الساعة فى الخرطوم .............. إذا كانت الساعة فى (موسكو) الآن هى السابعة صباحاً

 

1-  الثالثة صباحاً

1-     الواحدة ظهراً

2-     العاشرة مساءاً

3-     جميع الإجابات غير صحيحة

 

الإجابة :

الإجابة رقم أربعة هى الإجابة الصحيحة وهى أن جميع الإجابات غير صحيحة  فعندما تكون الساعة هى السابعة صباحاً فى موسكويا أستاذ تكون الساعة فى الخرطوم هى السادسة صباحاً بتوقيت (السودان) المحلى وهى الساعة التاسعة بتوقيت (قرينتش) أى الساعة السابعة بتوقيت (الإنقاذ) والبكور !

 

السؤال الثامن : أقصر الطرق إلى الموت هى الذهاب إلى ...........................

1-     المستشفى

2-     الإسبتالية

3-     المستوصف

4-     كل الإجابات صحيحة

 

الإجابة :

أكيد يا أستاذ كل الإجابات صحيحة .. هو كان كل الإجابات ما صحيحة الناس دى كانت (كسرت) على الأردن ذى المطرة الأعمى شايل المكسر ما كان قعدت إتعالجت هنا ومشت (أحمد شرفى) !

 

السؤال الثاسع : الساكت عن الحق شيطان ...............................

1-     أحمق

2-     أطرش

3-     أخرس

4-     عاوز يعيش

 

الإجابة :

الإجابة الصحيحة هى نمرة أربعة .. الساكت عن الحق (زول شيطان) وعاوز يعيش مالو ومال التلتلة والبهدلة أفرض قال (الحق) يعنى ح يعملو ليهو (تمثال) ما (عاهه مستديمة) !

 

 

السؤال العاشر : ثورة التعليم العالى ساعدت على إزدياد أعداد .......................

1-     الأدباء

2-     الشعراء

3-     الأطباء

4-     اللقطاء

 

الإجابة :

أفتكر يا أستاذ الإجابة الصحيحة هى رقم أربعة .. كيفن ما تكون ساعدت على زيادة عدد اللقطاء و(البت) تكون جايه من قرية صغيرة من (سقط لقط) ومتوسط دخل الأسرة بتاعتا (ميتين جنيه فى الشهر) وتجى العاصمة للجامعة عشان تقرأ (دبلوم علوم منزلية) وتكون عاوزة ليها (ببسى وسندوتشات) فى اليوم بى (عشرة ألف) ده غير تصوير المذكرات و (الإسكراتشات) والكريمات والبلوزات والشنو ما بعرف داك .. !!

 

السؤال الحادى عشر : أكثر لفظ يستخدمه الموظف هو ..................

1-     تعال بكرة

2-     ماشين الفطور

3-     ورقك ناقص

4-     ماشين الصلاة

 

الإجابة :

أفتكر إنو كل الإجابات خطأ هو الموظف فاضى من الكلام فى الموبايل عشان يتكلم مع المواطن يا استاذ الظاهر إنك ما قاعد تمشى مكاتب حكومية !

السؤال الثانى عشر : أسرع الطرق للثراء هى أن  ............................

1-     تشتغل كمعالج بالأعشاب

2-     تعمل معالج بالقرآن

3-     تشتغل كمعالج بالإبر الصينية

4-     تنتحل شخصية شرطى مرور

 

الإجابة :

السؤال ده يا أستاذ خارج المقرر !

 

 تقبلو مرورى وفائق إحترامى وتقديرى لمجهوداتكم وسدد الله خطاكم ووفقكم لما يحبه ويرضاه  




[ندعوك للتسجيل في المنتدى أو التعريف بنفسك لمعاينة هذه الصورة]


عدل سابقا من قبل منير على طه في الأحد 26 ديسمبر 2010, 6:42 am عدل 2 مرات
الرجوع الى أعلى الصفحة اذهب الى الأسفل
http://madmax4life.spaces.live.com/
مشيرة
 
 


الموقع : امدرمان
عدد المساهمات : 1276
تاريخ التسجيل : 27/01/2010
العمر : 29

مُساهمةموضوع: رد: أملأ الأماكن الخالية (مع الحلول)   الخميس 09 ديسمبر 2010, 9:04 pm

والله مواضيعك حيرتنا عشان نقراها الا نعمل رد قبل ما نقدر نقرا شئ وتبقي واضحة

وبعدها ياردينا يانومنا ساي
هههههههه



يديك العافية وتعرس انتا وقدورة ههههههههه
الرجوع الى أعلى الصفحة اذهب الى الأسفل
نضارعبدالكريم العمده
 
 


عدد المساهمات : 1064
تاريخ التسجيل : 01/09/2010

مُساهمةموضوع: رد: أملأ الأماكن الخالية (مع الحلول)   السبت 18 ديسمبر 2010, 8:09 am

والله يا منير اسالتك عجيبه والاجابات تبرد البطن !!من حيث اصابتها كبد الحقيقه ..بس بتجيب مغص من واقعنا وحالنا المتردى ..
الله غالب ويتصلح الحال
الرجوع الى أعلى الصفحة اذهب الى الأسفل
 
أملأ الأماكن الخالية (مع الحلول)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  القسم الثقافى -
انتقل الى: