شبكة مراغه الأصاله والتاريخ



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

شاطر | 
 

 لا ينقصنا سوي مشاهدتكم الغاليه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
اسماعيل عبد الحميد
 
 


عدد المساهمات : 65
تاريخ التسجيل : 30/11/2010

مُساهمةموضوع: لا ينقصنا سوي مشاهدتكم الغاليه   الإثنين 24 يناير 2011, 11:07 am

هذاالعنوان اعلاه....كان يكتب في اليوم الاف المرات فهو بالطبع يمثل عباره كانت هي القلب والفؤاد لمقدمة كل خطاب او(جواب) مقرونة ب(كما نحن والحمدلله علي احسن حال)...نعم...لقد عاشت هذه العبارات اياما من (العز)لتمرعليها السنوات وتقبع حزينه علي ارفف (الكلاسيكيه),.انتهي زمان الخطاب وايام الطوابع التي كان جمعها يمثل الهوايه الاولي في العالم...اصبحت بنايات البريد والبرق (اطلالا)في كل مكان.ولكن لاتنفك عنها ابدا لواعج الحنين والاشجان...فالكل لازالت تحضره زكريات هذه الامكنه ,,وكيف كان المرؤ يخفق فؤاده عندما يصل قبالة مباني (البوسته)(ليرمي الجواب)داخل صندوق عن طريق(فتحه صغيره)صممت علي حجم المظروف وهي (مدحرجه)تجذب المظروف وكانها تبتلعه..نعم..نتزكر رائحة الخطاب القادم من الاهل وكيف كانت جمهرة الاسره والتفافها حول من يهم بفتح(الظرف الملون)والكل يناشده بالحزر حتي لايتلف الخطاب...وهنا تحضرني طرفه حدثت في سوق دنقلا(سوق الملح والطرف) عندما دخل السوق احد(الحلب,,,الغجر)ولم يكن هنالك بديل للخضرجي صانع النكات(عبدالدائم حلال)ليقرا للحلبي الخطاب القادم اليه من كرمه لان الوقت مازال باكرا والسوق(فاضي)من الناس...فتسلم عبدالدائم(الامي)الخطاب وقام (بشرط)الظرف من الوسط والحلبي..زاغت عيناه(وبلع ريقه) ليتشكك في امر قارئ الخطاب...فامسك عبدالدائم نصفي الخطاب وقال بسمالله الرحمن الرحيم وبه نستعين وووووووو,,فصاح الحلبي (هات م الاخرياعم الشيخ)فهم القارئ بماذا يقول....وتوكل علي الله واتي بحديث لاعلاقة له بالمكتوب...صائحا بكل جديه(عمك شنطح جاك ينطح تديه ايييييه؟)فثار الحلبي(جاك تور لما ينطحك...انا م الاول ومن ساعة مافتحت الجواب عرفتك حمار.......بكسر الحا....علي الطريقه الحلبيه) فوقع عبالدائم من(التربيزه)ضحكا والحلبي يحول ضربه...لتصبح نكتة من نكاته التي لاتنضب....وفي ذات مره جاء احد ظرفاءالمدينه بالقرب من (كشك)المرحوم الياس الغندقلي وهو موزع خطابات البريد الاول حينها وتصادفت الامور عندما كان وردي يغني في _(الكشك)المجاور(خطاباتي البوديها تقول لا بتمشي لاحاجه)وفي سرعه غريبه قال الظريف لعم الياس (ليه ياحاج الياس ؟ليه الاهمال ده كله؟؟ ياخي ما اتلومت فينا,,,)....وزكريات الناس مع الجوابات لاتنضب....ويالها من ايام تم قتلها شنقا بمقصلة العولمه...فقد كتب السر دوليب رائعته (انا والاشواق)للفنان محمد ميرغني..ليتنبا بعهد قادم للمراسله (وقدكان)ذلك عندما قال(قبل ما اختم سلامي بتمني لو ردك يجيني,,) نعم لقد ماتت ايضا عبارات(مع عاجل الرد...الرد سريع...يجدهم بخير)...احبابي الكرام ما دفعني لكتابة هذا البوست انني وقبل شهور كنت قد عثرت علي خطابات اثريه في ارشيف الوالد منهم خطاب مرسل له من المرحوم عبدالله محمد صالح قبيل رحيله بايام وهو يوصيه علي (لبس المدارس)الخاص بابنائه وبناته والاخر وجدته قبل عام وعمره اكثرمن ستون عاما وكانه قد كتب اليوم ....كان مرسلا من(مصر )من الحاج عوض فضل عثمان الي جدي المرحوم احمدبلال ومااعجبني فيه طريقة كتابته وتلك الوصايا الاخويه التي حملهاالخطاب ...نعم تحول الجواب الي وسائط جديده افقدت المراسله المذاق الحقيقي,,,فاما عبارة (قابل للكسر) نجدها قد تحولت الي (جاري التحميل)...ولكن يبقي السر في عدم تغير طعم الاغنيات التي غينت للرسائل(وين رسايلك ووين كتاباتك الي؟؟....وياطير ياماشي لاهلنا بسراع وصل رسايلنا.....والرسائل الاحلي من عسل النحل.....ياساعي البريد.........اكتبلي ياغالي الحروف...)والاغنيات في هذاالشان لاتنتهي ولكني سمعت جزار بالسوق في الايام الاولي لظهورالموبايل يغني بصوت جميل (حبيبي مسكل لي وانا امسكل ليك بالحاصل بي والحاصل بيك) وعند هذا الجيل ربما يستقيم المعني(ولارايكم شنوو؟)ارجو ان كنا محظوظين..ان يتناول الكبار بعض الصور القديمه لاسيما لحظات اطلاق الباخره لصافرتها التي كانت تاتينا صباحا عبر جناين(المرده)ليختلج هذا الصوت الحنون بصوت وابور جوزيف والدناكي الاكثر حنيه.................................زمان الناس هداوة بال .....وانت زمانك الترحال....قسمتك يارقيق الحال.ومكتوب ليك تعيش رحااااال............
الرجوع الى أعلى الصفحة اذهب الى الأسفل
طارق عبد الوهاب أحميدى
 
 
avatar

عدد المساهمات : 610
تاريخ التسجيل : 08/12/2010

مُساهمةموضوع: رد: لا ينقصنا سوي مشاهدتكم الغاليه   الإثنين 24 يناير 2011, 11:53 am

---------------------------


عدل سابقا من قبل طارق عبد الوهاب أحميدى في الإثنين 24 يناير 2011, 1:16 pm عدل 1 مرات
الرجوع الى أعلى الصفحة اذهب الى الأسفل
طارق عبد الوهاب أحميدى
 
 
avatar

عدد المساهمات : 610
تاريخ التسجيل : 08/12/2010

مُساهمةموضوع: رد: لا ينقصنا سوي مشاهدتكم الغاليه   الإثنين 24 يناير 2011, 11:55 am

طارق عبد الوهاب أحميدى كتب:
[color=blue]
اسماعيل عبد الحميد كتب:
اكثرمن ستون عاما وكانه قد كتب اليوم ....كان مرسلا من(مصر )من الحاج عوض فضل عثمان الي جدي المرحوم احمدبلال ومااعجبني فيه طريقة كتابته وتلك الوصايا الاخويه التي حملهاالخطاب ...نعم تحول الجواب الي وسائط جديده افقدت المراسله المذاق الحقيقي,,,فاما عبارة (قابل للكسر) نجدها قد تحولت الي (جاري التحميل)...ولكن يبقي السر في عدم تغير طعم الاغنيات التي غينت للرسائل(وين رسايلك ووين كتاباتك الي؟؟....وياطير ليك تعيش رحااااال............

الله الله يا اسماعيل ...

ربنا يديم التواصل بين الاحباب ..
هذا اليوست والذى قراته اكثر من مرة ...لروعته .. وحنيته ..
والمعلزمات الحلوة التى تضمنها الحديث..
نعم اخى اسماعيل .. الخطابات لها نكهتها لانه دايما ما تحمل اشواق حقيقية
وبها رايحة من نحب اذا راسلنا..
ولكن تيقى مقولة ان العالم اصبح قرية صغيرة قائمة بفضل التكنلوجيا
والتى اصبح معها العالم..غرفة صغيرة
ونسأل الله ان تكون كلمة جارى التحميل ..
جارى توصيل الحب وقياسة فى الجهاز الجديد الذى سيحمل اسم
(حبفون)
[/
[/
color]size]
[size=24]اصدار شركة مراغة لارقى انواع التكنلوجيا الحديثة ...
الرجوع الى أعلى الصفحة اذهب الى الأسفل
طارق عبد الوهاب أحميدى
 
 
avatar

عدد المساهمات : 610
تاريخ التسجيل : 08/12/2010

مُساهمةموضوع: رد: لا ينقصنا سوي مشاهدتكم الغاليه   الإثنين 24 يناير 2011, 11:57 am

طارق عبد الوهاب أحميدى كتب:
طارق عبد الوهاب أحميدى كتب:
[color=blue]
اسماعيل عبد الحميد كتب:
اكثرمن ستون عاما وكانه قد كتب اليوم ....كان مرسلا من(مصر )من الحاج عوض فضل عثمان الي جدي المرحوم احمدبلال ومااعجبني فيه طريقة كتابته وتلك الوصايا الاخويه التي حملهاالخطاب ...نعم تحول الجواب الي وسائط جديده افقدت المراسله المذاق الحقيقي,,,فاما عبارة (قابل للكسر) نجدها قد تحولت الي (جاري التحميل)...ولكن يبقي السر في عدم تغير طعم الاغنيات التي غينت للرسائل(وين رسايلك ووين كتاباتك الي؟؟....وياطير ليك تعيش رحااااال............

الله الله يا اسماعيل ...

ربنا يديم التواصل بين الاحباب ..
هذا اليوست والذى قراته اكثر من مرة ...لروعته .. وحنيته ..
والمعلزمات الحلوة التى تضمنها الحديث..
نعم اخى اسماعيل .. الخطابات لها نكهتها لانه دايما ما تحمل اشواق حقيقية
وبها رايحة من نحب اذا راسلنا..
ولكن تيقى مقولة ان العالم اصبح قرية صغيرة قائمة بفضل التكنلوجيا
والتى اصبح معها العالم..غرفة صغيرة
ونسأل الله ان تكون كلمة جارى التحميل ..
جارى توصيل الحب وقياسة فى الجهاز الجديد الذى سيحمل اسم
(حبفون)
[size=24]اصدار شركة مراغة لارقى انواع التكنلوجيا الحديثة ...
الرجوع الى أعلى الصفحة اذهب الى الأسفل
مشيرة
 
 
avatar

الموقع : امدرمان
عدد المساهمات : 1276
تاريخ التسجيل : 27/01/2010
العمر : 30

مُساهمةموضوع: رد: لا ينقصنا سوي مشاهدتكم الغاليه   الإثنين 24 يناير 2011, 12:34 pm

والله ابحرت معاك لاماكن مختلفة زمن برسل لي صحباتي الرسائل

ايام جميلة وزي ماقال طارق يارب تكون جاري لتحميل للحب والوئام
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: لا ينقصنا سوي مشاهدتكم الغاليه   الإثنين 24 يناير 2011, 3:01 pm

الأخ العزيز سمعه (نجم نجوم البقاده)
ربنا يديك العافيه وجاي تفتش الماضي خلاص الماضي ولا زمان صراحه اخي سمعه تجدني تواق لقراءة اي شي
عن الماضي وتجتاحني سعاده غامره ومن عجائب الصدف كنت اتحدث مع احد الزملاء عن ايام الرسائل والبريد
عن موضوعك بالتحديد .الحنين الي الماضي يثير الشجون والآهات واذا تأملت فترة الرسائل والآن تجد فارق الزمن
بسيط تحياتي اخي سمعه ومزيدا من التنقيب والبحث
الرجوع الى أعلى الصفحة اذهب الى الأسفل
نضارعبدالكريم العمده
 
 


عدد المساهمات : 1064
تاريخ التسجيل : 01/09/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 6:19 am

اذا تعطل التليفون ولم تسرى فى اوصال الاسلاك الحرارة فاكتبى لى عن مشاغلك ..عن اى شئ فى الدنيا شاغلك ..يا سلااااااااااااام تذكرت العبارة من صديقتى وهى توصينى ان لا انقطع وكنا نجمع خطاباتنا القديمه وفى ساعة صفاء نراجعها ونراجع ذكرياتنا معا ونضحك كثيرا على هذه الجمله التى كنا نسخها من ذاكرتنا الى الورق دون تمعن فى خطاء بها هههههههههههههههههههه ...لله درك يا اسماعيل وانت ترجع بنا الى الايام الحنينه والبساطه ورغم ان الجمله وتركيبها لكنها كانت لها سحرها وفعلها هههههههههههههه الله يجازى كلماتك وافكارك خير .ولا اوقف الله لقلمك مسيرة ول لتعابيرك حسا وصوتا .تعرف يا اسماعيل زمان لما يحب فرد ان يكتب لا يكتب الا بصدق لا الكتابه فى حدها موجعه ومقلقه وبتحتاج لجهد ان شخصيا لما كنت اكتب كنت اكتب بصدق وليس لاى حد او اى زمن لذلك الكلام بيكون حقيقى ..لكن الان المسج جاهزة بنرسلها مجاملة ولا نعنى مافيها الله يقطع الجوالات وسنينها وكتير فكرت انو يا ليت هذه الجوالات فقط للاتصال لانه الاتصال ايضا يكون عند الحوجه فقط..فعلا الزمن اتغير ويا حليل زمن كتبوا الرسايل على المناديل وورق البردى وارسلوها مع الطائر الزاجل .تبدل الزمن .شكرا وانت تسعد عيوننا بتلك الكلمات والسرد والتداخل والتمازج فى الجمل بشكل متفرد وانت تاتى بالامثله الحية .
حقيقه قريت وقريت وقريت ولسه بقرأ وعليك الله واصل
الرجوع الى أعلى الصفحة اذهب الى الأسفل
قرشى شيخ ادريس
 
 
avatar

الموقع : الولايات المتحده
عدد المساهمات : 974
تاريخ التسجيل : 28/03/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 7:19 am

الاخ العزيز سمعه نرجو أن تكتب فى القديم حتى لو ماعارفو أسأل عنو(والله الكتبتو ده كأننا شايفنو هسع قدامنا).
أنا شخصيا أحب القديم وأعشقه لاصالته وصدقه...ففتشنا الجديد لحدى العالم الأول هنا لقينا انو زى قديمنا مافى.
الرجوع الى أعلى الصفحة اذهب الى الأسفل
zonourain
 
 
avatar

عدد المساهمات : 359
تاريخ التسجيل : 01/05/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 7:43 am

الاخ اسماعيل حملت افكارنا وخيالنا الي زمان وسارجع بك كما كنت حينه
واذا سالتم عن احوالنا فنحن الحمد الله لاينقصنا شئ سوي مشاهدتكم الغاليه التي نتمناها علي الدوام وبعد...... وطبعا الصلصله والقرفه والمرق والرز وهدوم الشفع وصلنا مع عبدالمجيد وجانا من كابتود امبارح وضبحنا ليهو التيس اابوقرنين في العشاء انشاء الله التمر والجرمه (التسالي) والابريق الاحمر والابيض والدوم يكونو وصلو كويس وبعدين الكيس المربوط بالخيط الاحمر داك وزعوا لي ناس مراغة وكابتود ومقاصر كلهم في مصر
انا صغير جدا وحسب وتيرة الخطابات السابقه كنت ميال دائما للتفصيل الصوري وبكل جوانب الحياة اليوميه
فالاخ عبدالرحمن كان في ليبيا حينها وكنت بكتب ليهو
امانه غنمايتنا كمان ولدت تيمان ولحدي حسع قعد ناكل (اللقيشي) وحمارة سراج رجلوا اتكسرت وعمي نورالدين كمان الليله ماسك المويه في الضره (الذره) والعقرب امانة ماطق سيده عبده وعشان اتاخروا ما جابوهو لي ابوي عشان كده متاخر عندهم وما مشي الصلاه في الجامع بحري والديك حقنا كمان ضبحوهو وجدادتنا ولدت خموستاشر سيوسيوه وكمان يد الطرمبه غيرناهو وطربنا الطرميه بوهيه وامبارح ابوي جاب شوال لبن وشوال سكر وعشرة شوالات قمح في المخزن واندروفر عزالدين عيسي كان دار يضرب حمار حجول حسع القيردونه والطيور مليانين في البيت عشان قعد ينضفوا العيش للطاحونه وحماماتنا بقوا كتار وولدوا عشان كده قعد يعملوا قوقه تاني وحمارة حمزة عثمان ولدت دحيشة ابيض وناس المسيد جايبين الزلابية بكره للناس كلهم عشان اليوبيوب وضابحين التيران في ساتي شريف لي عشاء الميتين
وايضا حسين صافي الدين كان بينتظر جوابي اكثر من جواب ناس بيتهم وكنت اكتب
الرادي (الراديو) حق عليه اختي الخيط حقو اتقطع والشريط الرسلتو حق الطيب عبدالله وعثمان حسين وصلوا وعبدالرحمن وعبدالغفار محمد صالح قاعدين حسسسسع في اللوضة (الاوضه) وقعد يدقوا العود وجاهم كمان عبدالواحد ودياب وميسر واسحق وامبارح كلهم مشوا السنما (السينما) وسرقوا الحمير من الحله باليل وقالو الفيلم فيهو كهوج ودهرمندر وكمان المولد امبارح كان في السوق والله الشفع سرقوا كترت حلاوة مولد من تحت التربيزة عبدالباسط عزالدين اشتري لي عروسة المولد ولحدي حسع راقد اكلت اليدين وخليت الباقي ياحسين امبارح شرف الدين وسراج وعبدالله وناس حلة تحت اكلوا الملوحه في بيتكم ونسه عملت ليهم سته قراريص وبعدين فتحوا من شوال القنديله واكلوا امانه ياحسين البحر هايج شديد وناس حلة تحت خايفين التماسيح والورل يجيهم بالليل والمويه يقت سودااااااااااء والدونكي حق جمال فضل ودوهو البيت والفزع شغال عشان يسدوا البحر امانه كمان عمنا في البحر كلنا الاولاد والبنات وقبضنا السمك كتيييييييييير والنخله الشرق بابكم داك الابي حقوا كلوا تكسر عشان كده مافي زول يقدر يطلعوا الا السر العربي لمن يجي من الديم .... كانت ايام جميله
الكتابة اعلاه بلغة انا في اولي اوثانيه ابتدائي
وايضا جزء كبير من تلك الرسائل موجوده الان
الله يعيد ماضينا ومراغة خمسين سنه من معاملاتنا
ولد نصرالدين الكان اصغر واحد


عدل سابقا من قبل ذوالنورين نصرالدين في الثلاثاء 25 يناير 2011, 8:27 am عدل 2 مرات
الرجوع الى أعلى الصفحة اذهب الى الأسفل
نضارعبدالكريم العمده
 
 


عدد المساهمات : 1064
تاريخ التسجيل : 01/09/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 8:20 am


Very Happy Very Happy Very Happy Very Happy Very Happy Very Happy Very Happy Very Happy Very Happy Very Happy Very Happy Very Happy Very Happy Laughing Laughing Laughing Laughing Laughing Laughing Laughing Laughing
اضحكتنى اخى زو النورين الله يديم عليك الزكريات والتفاصيل الجميله واجمل شئ اللقشى ههههههههههههه والله اضحكت دواخلى بهذا السرد والماضى الجميل شكرا جميلا
وزى ماقال قرشى يا اسماعيل اكتب لينا عن كل شئ اصيل وقديم وسمح
الرجوع الى أعلى الصفحة اذهب الى الأسفل
ياسرابراهيم
 
 
avatar

عدد المساهمات : 466
تاريخ التسجيل : 24/01/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 9:36 am

العزيز سمعه
شكرا نديا وانت تصحي فينا الذكريات وايام الرسائل واشواقنا لي نخل الفريق
وذي ما قالت د/نضار اصدق الكلام ما كتبناهو في تلك الايام
(وكيف حالكم في هذه المده الطويله التي لم اراكم فيها)
وتفاصيل جوابات ابوعزام تنتزع الدموع والضحكات فقط وكت واحد
وحله ابوالدايمي دي يا اسماعيل فيها حنين خاص ما تسألني ليه لاني ما عارف
يمكن عشان لما كنا بنسمع (الليمون سقايتو عليّ) كان ناس ابوالدايمي يسرحون
مع عثمان حسين وخلي قبلك معاي شويه
احفر عميقا عميقا يا سمعه واملأ يدك من كل الذكريات واكشحا فينا
تحياتي للحله كلها و ،، بدون فرز،،
الرجوع الى أعلى الصفحة اذهب الى الأسفل
وصفية عيسي
 
 


عدد المساهمات : 719
تاريخ التسجيل : 25/05/2010

مُساهمةموضوع: لا ينقصنا سوي مشاهتكم الغالية   الثلاثاء 25 يناير 2011, 10:28 am

تسلم الاخ اسماعيل فعلاً ايام الواحد بكتب الجواب طبعاً انت تنسي نفسك عديل وتكتب بصدق من غير تمل وتعبر بشعور جميل وصادق ويا اريت ايام زمان تعود وهسع الواحد بيتكلم في الموبايل وتلق الرصيد خلص وينتهي معه الكلام الحلو وانت رجعتنا الي الذكريات الحلوة العشناها ربنا يديك الصحة وتكتب لنا المزيد عن ايامنا الحلوه
الرجوع الى أعلى الصفحة اذهب الى الأسفل
حيدرالفاضل
 
 


عدد المساهمات : 18
تاريخ التسجيل : 16/01/2011

مُساهمةموضوع: دفعه--الصديق الصدوق   الثلاثاء 25 يناير 2011, 10:40 am

[] والله يا سمعه انت انسان رائع-- افتخر بكل العلاقات التى تربطنا معا--والله زكرتنى ايام اضحكتنى وتالمت على فراقها[
الرجوع الى أعلى الصفحة اذهب الى الأسفل
Abd Alftah Al Gamel
 
 
avatar

عدد المساهمات : 133
تاريخ التسجيل : 24/11/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 11:13 am

جاء اسماعيل تبدو بسمة في شفتيه
حاملا صحن طعام ورغيف في يديه
جاءه هر صغير ومشي في قدميه
حاني الظهر بشوشا رافع الذيل عليه
قال اسماعيل لما ظهر القط لديه
يا صديقي انا ادري بالذي تسعي اليه
دائماً انت هكذا يا اسماعيل تدرى بالذى نسعى اليه ان نفتح نافذة الحاضر
ونطل بها الى حدايق الماضى حيث زهور التواصل والمودة ورايحة الذكريات
الجميلة وعصفاير الطفولة واشجار باسقة بقامة العم والخال والجد والحبوبة
والجار تحمل ثمار بنات العم والجيران والحله يا حليل الزمن الجميل والله
الواحد يخشى انو يجى زمن الناس تقول يا حليل زمن النص كول والرسائل
القصيرة
الرجوع الى أعلى الصفحة اذهب الى الأسفل
النور إدريس
 
 


عدد المساهمات : 81
تاريخ التسجيل : 01/02/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 5:57 pm

الرائع سمعة لك التحية وأنت دوما تأتى تخاطب النفوس لنجدها تكتب دون أن تشعر
بالامس القريب قمت بزيارة (الوجيه عبيد) وأطلعنى بخطاب كنت ارسلته له ايام الجامعة فسررت فعلا
لأن الخطابات دائما توثق لحقب ومسيرة الانسان
ومن هنا أدعو الجميع بأن ينقبوا فى ذاكرة التاريخ وفى بطون حقائبهم لتكتب بالموقع حتى لا تمحوا الايام
هذه الذكريا ت
لك شكرى .
الرجوع الى أعلى الصفحة اذهب الى الأسفل
mahmoud
 
 
avatar

الموقع : Qatar
عدد المساهمات : 144
تاريخ التسجيل : 13/01/2011
العمر : 37

مُساهمةموضوع: رد: لا ينقصنا سوي مشاهدتكم الغاليه   الثلاثاء 25 يناير 2011, 8:47 pm

الحمد لله رب العالمين
والصلاة والسلام على أشرف خلق الله أجمعين
سيدنا محمد صلوات الله عليه وسلامه
اييييييييييييييييييييييييك والله لكن ذكرتنا أيام جميلة خلاص
وبعدين لاحظت ليك في حديثك فيه انجزاب لا إرادي ،
يعني مستحيل تبدأ الموضوع وتقوم تترك بقيته
والله يا إسماعيل انا غايتوا بس بتلقحك انت بس في كلامك المنسق والبسيط دة
وصلي اللهم وبارك على سيدنا محمد (ص) وسلم تسليما كثيراً



[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
اسماعيل عبد الحميد
 
 


عدد المساهمات : 65
تاريخ التسجيل : 30/11/2010

مُساهمةموضوع: رد: لا ينقصنا سوي مشاهدتكم الغاليه   الجمعة 04 فبراير 2011, 10:17 pm

فهمي كمل........................................اقول شنو؟؟؟؟؟ انا من اسبوعين بدخل المنتدي واستمتع بهذه المفردات الحلوه والمليئه بالاحساس الصادق...نعم استمتع واهرب من الرد علي حروف الرائعين الذين طوقوا (مساهمتي)المتواضعه بهذا الحب وزينوا البوست بنقرشاتهم الجميله علي الكيبورد.ليملؤني الاعزاز حتي النخاع..بما سطره الاحباب في حق ما كتبنا...لكم الحب اجزله اخوتي واخواتي..طارق..مشيره..عبده نصر..نجمنا (ذنو)...د.نضار..قرشي..ياسر..وصفيه..النور..حيدر..الجميل..ومحمود.......لكم كل محبتي وستبقي حروفكم هي الزاد ...واااااااه من قلة الزاد ووحشة الطريق يافتاح ياجميل..............
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: لا ينقصنا سوي مشاهدتكم الغاليه   الخميس 07 أبريل 2011, 12:31 am


بسم الله الرحمن الرحيم


الاخ اسماعيل عبدالحميد


بعد ان اهدي اليكم اطيب تحياتي واشواقي القلبية, اتمني ان تكون بخير وصحة جيدة كما نحن
الحمد لله علي مايرام في احسن الحال والاحوال لاينقصنا شئ سوي عدم مشاهدتكم الغالية
والتي نتمنوها من علي البعد.

اما بعد

وصلنا عزيز خطابك, وعلمنا بما فية, وقد قمنا بتوزيع المقالات التي ارسلتها مشكورا علي المنتديات

المنتدي الاجتماعي المقال طلع مقاسه بالضبط؟, اما عمتك المنتدي السياسي زعلانه لان الارسلته شوية

اما انا في المنتدي العام فقد شاركني بقية اخواني في المنتديات الاخري حتي لم يتبقي لي الا القليل

نرجو منك ان ترسل لنا بعض المقالات بصورة عاجلة حتي نسعف الملل الحاصل في المنتدي.
اما منتدي المشاريع فالدكتورة في انتظار لقاءاتك مع المجموعة.
اما اذا دار محور سؤالك عنا فنحن بخير والحمد لله والمدير يبلغك تحياته وكل المشرفين والاعضاء مشتاقين ليك كتير

هناك كثير من الاعضاء الجدد الذين لم تلتقي بهم وهم سائلين عنك بشدة.

وفي الختام تقبل سلام المشرف العام والمدير العام ونائب المدير العام والسادة المشرفين والاعضاء والقراء... وتحياتنا

لكل الاهل بمراغة بدون فرز صغيرهم وكبيرهم.

اخوك دائما وابدا ... ماهر


ملحوظه:
هناك كثير من المقالات في المنتدي الاجتماعي ومنتدي التعارف في انتظار قلمك



Very Happy Very Happy Very Happy Very Happy Very Happy
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: لا ينقصنا سوي مشاهدتكم الغاليه   الثلاثاء 12 أبريل 2011, 7:57 pm

حقيقه الاخ العزيز اسماعيل لاينقصنا سواء عدم مشاهدتك حضرت بقوه وفارقت بقوه
بعد مشاركات رائعه انفعل معها الجميع نامل وننتظر اطلالتك في القريب العاجل
رغم المشغوليات
الرجوع الى أعلى الصفحة اذهب الى الأسفل
هاني 0العمدة
 
 
avatar

الموقع : مراغة
عدد المساهمات : 258
تاريخ التسجيل : 22/01/2010
العمر : 36

مُساهمةموضوع: رد: لا ينقصنا سوي مشاهدتكم الغاليه   الأربعاء 13 أبريل 2011, 12:59 pm

والله ياسمعة اول مرة اقرا المقال دة
ياراجل حرام عليك كنت داسيهوا وين؟؟؟ ياخي دة ابداع وماغريب عليك ..لانك
تمتلك موهبة متميزة في الكتابة وخاصة ماهوا متعلق بالفن والثقافة وانت تبرع في رسم صورة
حية للزكريات الجميلة وانا اقراء كتاباتك عن الزمن الجميل كانني انظر الي لوحة رسمها فدياس
ذلك الاثيني المجنون ...وانت تكتب عن الخطابات القديمة اتخيلك تعبر عن صديقي الاستاذ
عبد العال السيد وهو يترجي حبيبته ان تكتب له خطاب( بالقديم طبعا)
اكتب لي عن سنينك ...وكل ما الايام تمر بتزيد حنينك
واكتبي لي عن مشاغلك ..وقولي لي عن اي شئ في الدنيا شاغلك

صديقي الاثير قاتل الله الجوال والزمن فقد افسدا بهجة وطعم كل ما هو جميل
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: لا ينقصنا سوي مشاهدتكم الغاليه   السبت 14 مايو 2011, 12:45 am


لاينقصنا شئ سوي عدم مشاهدة اسماعيل الغالية
الرجوع الى أعلى الصفحة اذهب الى الأسفل
شريف عبد المتعال
 
 
avatar

الموقع : ايطاليا
عدد المساهمات : 3796
تاريخ التسجيل : 01/01/2011

مُساهمةموضوع: رد: لا ينقصنا سوي مشاهدتكم الغاليه   السبت 14 مايو 2011, 6:25 am

نعم الأستاذا ماهر ربنا يرجع كل الغائبين ..... و نأمل من الشباب العندنوا أميل او وسيله اتصال بعضو غائب أن يراسله ليطمأن عليه و يبلغه تحيات شباب و شبات المنتدي ...


من فوائد القراءة فتق اللسان، وتنمية العقل، وصفاء الخاطر،

وإزالة الهم ،  والاستفادة من التجارب، واكتساب الفضائل.

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://shareef.forumattivo.it/
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: لا ينقصنا سوي مشاهدتكم الغاليه   الإثنين 04 يوليو 2011, 12:06 am


نامل ان يتصل شخص بالرجل الموهبة سمعة لنطمئن علي اخباره وليواصل اهله كما كان
الرجوع الى أعلى الصفحة اذهب الى الأسفل
وصفية عيسي
 
 


عدد المساهمات : 719
تاريخ التسجيل : 25/05/2010

مُساهمةموضوع: رد: لا ينقصنا سوي مشاهدتكم الغاليه   الإثنين 04 يوليو 2011, 5:32 am

[b]لكم التحية الغالية لكل المتداخلين وحقيقة رايت الاخ اسماعيل من بعيد بدنيا فهو بخير اما عن غيابه عن المنتدي لا ادري ما الحاصل انشاء الله يعود بالسلامة[/b]
الرجوع الى أعلى الصفحة اذهب الى الأسفل
عوض عزالدين بشير
 
 
avatar

عدد المساهمات : 43
تاريخ التسجيل : 25/05/2011

مُساهمةموضوع: رد: لا ينقصنا سوي مشاهدتكم الغاليه   الثلاثاء 05 يوليو 2011, 9:34 am

اخي اسماعيل لك التحيه اينما كنت اخر مرة تمتعت بمشاهدتك بكلية التربيه شندي في العام 96 حقيقتا اعجبني موضوعك واهاج الزكريات عن الايام الخوالي ولازالت الخطابات التي احتفظ بها من ايام الهيام والهوي تلهب المشاعر وخاصة التي كنت اتبادلها مع محبوبة الماضي وشريكة الحاضر وكثيرا مانجلس ونراجع ماكنا نتواثق عليه في الماضي واخلفنا فيه في الحاضر حيث اصبحت رسايلنا مواثيق شرف وخطوط رجعه ومرجعيه ................الموضوع يصلح لكتابة دراما سودانيه بعنوان الرسائل لك التحيه مجدد
الرجوع الى أعلى الصفحة اذهب الى الأسفل
هاني 0العمدة
 
 
avatar

الموقع : مراغة
عدد المساهمات : 258
تاريخ التسجيل : 22/01/2010
العمر : 36

مُساهمةموضوع: رد: لا ينقصنا سوي مشاهدتكم الغاليه   الثلاثاء 19 فبراير 2013, 12:13 pm

نتمني عودة اصحاب هذه المشاركات الجميلة ليعود المنتدي
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: لا ينقصنا سوي مشاهدتكم الغاليه   الأحد 10 مارس 2013, 2:17 am

بالامس قمت بارساله رساله خاصة للاخ الحبيب اسماعيل بطعم الشوق اليه والي مساهماته
وهو بالطريق اليكم مشرفا المنتدي .. في مقبل الايام .. وبطريقته في المخاطبه قال (بتلقاني قدامك في المنتدي) ونحن
بالانتظار ولاينقصنا سواء عدم مشاهدتك الغاليه
الرجوع الى أعلى الصفحة اذهب الى الأسفل
 
لا ينقصنا سوي مشاهدتكم الغاليه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  القسم العام -
انتقل الى: