شبكة مراغه الأصاله والتاريخ



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

شاطر | 
 

 ملامح من تراثنا الحديث

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: ملامح من تراثنا الحديث   السبت 26 مايو 2012, 5:22 pm

اولا قبل البدايه والدخول في موضوع التراث خطر في بالي بان ما سأقوم بسرده من اشياء يعتبر موجودا في بعض القري الي يومنا هذا مما يعني ان التراث يختلف من منطقه الي اخري وما يعتبر تراث في منطقة قديكون ساري المفعول في اخري وانا بصدد الذي اصبح تراث عندنا وايضا المغزي من الموضوع معرفة اشياء اخري لا نعلمها نحن يعني بالواضح دايرين ناس عم الامين الياس وباقي الخبرات يزيدونا علم.1/المعلاق ودا من الحاجات الاختفت لوجود التلاجات وفي ناس ما شافوه مع انو كان قريب موجود 2/السحاره الصندوق ودا برضو من الحاجات الاختفت بدلو جاء الدولاب لكن هو اشمل من الدولاب لانو كان بختو فيهو حاجات كتيره زي القروش الارياح الحلاوه البلح النوع السمح مش اي بلح الدهب القماش وحاجات لاحصر لها وكان عندو ريحه مميزه لامن يفتحوه3/الرحايه ودي اختفت من بدري شويه ظهرت بدلا الطاحونه 4/ القدح ايضا من الحاجات القديمه وظهرت الصحانه حديثا 5/ القوسيبه وهي ايضا من الاشياء التي اندثرت قريبا 6/ القوقع او القوقا وجات بديلا الاقفاص الحديثه للحمام والمباني في شكل قبب ومن الحاجات الانتهت الصفايح المعلقه في العرش للحمام برضو7/الماجور هو العجانه المصنوعه من الطين الفخار زي نص الزير كانوا بعجنو فيها العجين8/ القربه ودي من الحاجات الاختفت قريب بعد ظهور التلاجات والحفاظات 9/ الرتينه والفانوس ولمبه بنيه وايضا كلهم اختفوا قريب بعد ظهور الكهرباء 10/ القرعه ظهر بديلا الاكواز والكبابي 11/ الهبابه من الزعف اومن الصوف تشبه العلم 12/ الإدايات ودي من الحاجات الاختفت قريب خالص 13/ البل بضم الباء لجلب المويه 14/ المضرايه وكانوا بضروا بيها العيش 15/ النورج اوالنوريق اختفي قريب وجات بدلو الحصاده 16/ الساقيه وظهرت بديلا الوابورات 17/ الشبكه وهي مصنوعه من حبل الليف للتبن 18/ الفروه بدل البطانيه 19/ شنطة القرنه مصنوعه من الصفيح 20/الطرمبه المصريه للمويه ويدوروها باليد بدلا منها موية الحنفيات 21/ الوقايه لفافة توضع في الراس لحمل الاشياء 22/ الكشينبينج او الكشمبيل والسعن لدق اللبن واستخراج الفرصه ومن ثم السمن ودي من الحاجات الاختفت قريب 23/البو بفتح الباء وسكون الواو وهو عباره عن جلد العجل الصغير محشو بالتبن بعد موته في شكل صورة عجل وله ارجل من خشب (تمثال للعجل) وكان بعملوه للبقره حتي تدر اللبن بعد موت العجل لاي سبب من الاسباب24 / الطاقه بين الجيران لتبادل الاحتياجات 25/ المسله لخياطة الشوالات بالدباره26/صحن الباشري للحنه 27/ الاوجل اناء خشبي للضريره
ذاكرتي بالتأكيد حتخونني في هذه اللحظات لذكر كل الاشياء فيا جماعه الحاجات دي اختفت قريب لانو البلد اتطورت ودا تسلسل طبيعي للاوضاع وفي حاجات كتيره قلنا لسه في ناس موجوده عندهم يعني ما انتهت .
انا في انتظار المزيد من الحاجات
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: ملامح من تراثنا الحديث   الأحد 27 مايو 2012, 6:58 am


الزعيم ابو جارو
وانت لست من جيل (دق العيش) لكنك تربية حبوبات ملم بكل الوان التراث
حاجيات التراث كثيرة جدا وقد تتشتت عند الذاكرة... لكن بتخصصية ممكن الواحد يتزكر الاسماء يعني مثلا اذا اخدنا النخلة او التمر نجد القفة ابو ودان وهي كانت افضل طريقة لنقل العجوة الي السوق واتذكر البنات كن ايضا لهن نصيب من بيع العجوة لكنهن كن يفضلن العمرة بدل القفة لان العمرة سهلة الحمل علي الراس بمساعدة (الوقاية) وهي لفة قماش توضع علي الراس لحفظ ترتيب الشعر وتخفيف ضغط العمرة علي الراس, والوقاية كانت تستعمل ايضا عند جلب الموية من البحر او الجدول بواسطة الجركانات. اما العجوة اللينة جدا والنوع العسلي الممتاز فقد كان يحفظ في الكسكسيك(الكسكسيك) والكسكسيك اناء معمول من سعف النخل الاخضر ينسج بطريقة اقرب الي طريقة نسج البروش وكانت الفتيات بارعات في ذلك العمل الفني الهندسي المتقن. والبروش نفسها كانت تساعد علي حفظ التمر اللين ليجف تحت الشمس.
اما الازيار التي يحفظ فيها التمور بغرض طيب او بنية ليست طيبة فالسيد دولة الياس او عبدالرحمن لهما من المعلومات او ربما يظهر من له تجارب طيبه او غير طيبة ليشرح لكم

اما المقشاشة المشهورة لعملية النظافة فقد كانت تصنع من (الهروج) او العرجون كما تسمي عند العرب... كذلك حبل (الهشميق) كان يصنع من ليف النخل لنسج العنقريب او الس للساقية او غيرها... كما كنا نستعملها ونحن صغار لعمل الطرجيق وذلك لطرد الطيور التي تاكل العيش من القيساب (ماتقولوا لي القيساب ده شنو؟) .. الغريب ان الطيور كان مسموح لها اكل العجوة لانها تدل الانسان علي النوع الجيد والعجوة (اكل الطير) كانت محببة جدا وذا سبقت يداك لواحدة سالمة فسيخطر ببالك ان الشاعر الذي وصف البنت الجميلة ب (عجوة محس قدومة) قد اجاد الوصف.
كان الهروج له استخدامات كثيرة مثل خياطة الجوالات ووقود للنار وغيرها... اما ساق النخل نفسة فهو معروف باستخدامه في عرش المنازل حيث تسند بواسطة (البر دول) ورجاءا لاتسالوا عن البردول
هناك استخدامات كثيرة وتراثيات تذخر بها عمتكم النخلة, فاليزيدنا احدكم من تراثيات النخلة او من تخصص اخر غير النخلة

قولوا يالطيف

الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأحد 27 مايو 2012, 8:24 am

الاستاذ الجليل /ماهر
والله اتحفتنا بالاضافات الثره ههههههههه كيف وانت تربية حبوبات اللهم ارحم زينه فقيرالتي اخرجت لنا رجال مثلكم:
28/ الكسكسيق 29/العشميق 30/البر دول 31/ العمره 32/ القفه ام ودان 33/ الهروج 34/الطرجيق .
الرجوع الى أعلى الصفحة اذهب الى الأسفل
الأمين الياس الأمين
 
 


عدد المساهمات : 604
تاريخ التسجيل : 16/01/2011

مُساهمةموضوع: رد: ملامح من تراثنا الحديث   الأحد 27 مايو 2012, 9:04 am


ما شاء الله ياسر .. ماك هين والله .. أسأل عن العاج بتاع عمتي نصرة بت العمدة - دا برضو من التراث
الخواجة حبوبة ماهر : ما خلي شيء .. بس دقس شوية : حبل العشميق كان يفتل من ليف النخيل وحباله تستعمل في ربط البهائم وعمل السلبة - وغالبا ما تستعمل في النوريق - بالإضافة إلى عمل الشبكة التي تستعمل في نقل (التبن) من الكرواد - والشبكة كانت مقاسات من حيث سعتها
أما نسج العناقريب فكان من حبال الجريد أو الحلفة - وفتل الألس كان من الجريد الصافي لأن الحبل المفتول من الجريد يطول عمره في الماء بعكس حبل الليف
ولا واحد منكم تعرض لخم الماروق على ظهر الحمار (بالمزبلة) والمزبلة عبارة عن شوال تخيط فتحته العرضية وتفتح طوليا
ما خميتو الماروق - اسم الله عليكم - جيل الكيماوي
و(البر دول) ذكرني (البر كل) (والبر كوكي) و(البرتنتود) و(البرندورو) و(الكلي دول)
وكان في (الكلوتود) وخم العشر وعمل (الموسرتق) أيام الدميرة
ياسر كان لما يلمس العشر أمه تقول ليهو (كخ كخ) أما ناس هناي كان بخموا العشر على رؤوسم - شوف المفارقات دي - الله المستعان
.
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الأحد 27 مايو 2012, 8:44 pm

بالنسبه لي لازال البحث جاريا للمشاركة معكم واذا خانتني الذاكرة
دعوني اشاهدكم من علي البعد .. تعرف اخي ياسر كل الاشياء التي ذكرتها
كانت موجوده في منزل جدك (عبده شوده )له الرحمة والمغفره
البوست يصلح للتوثيق  وتكرار الزيارات .. مع وجود ماهر والامين
وياريت يظهروا بكري جعفر وهيثم وياسر ود بابكر

ياالله من الصباح تصنقر حولها في برد شهر واحد والحاجه تكون حلبت اللبن
وتكب ليك وصحن (الشريق) جنبك وتختار الغليط وتغمس .. وبعد شويتين هدوم
المدرسه في خبر كان وتسمع (الهي اكي كسبيرمو) وتختف الخرتايه والبستله
وجواها فتة اللبن ولا باقي الشعيريه البايته وتقوم جاري


[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الإثنين 28 مايو 2012, 7:26 am

العم الامين تحيه طيبه
والله عارفنك موسوعه في هذا المجال وانا قصدت ذكر اسمك في الموضوع عشان لو في اخطاء تصلحا لينا وانا ذكرت الساقيه من غير ذكر اسماء اجزائها مطلوب منك ذكر اسماء اجزائها.
35/ المزبله 36/الماروق 37/المسرتق 38/البركوكي 39/البرتنتود 40/الكلي دول 41/الكلوتود .... والله علم
الاخ/عبدالرحمن
(الهي اكي كسبيرمو) ههههههه الله لاكسبك بي العربي للمابفهموا الرطانه . واحلي مافي الموضوع انك عبرت لينا عن لحظة الذهاب للمدرسه وايراد الاتي:
42/ الشريق 43/الخرتايه 44/ البستله 45/ الكفتيرا 46/ الواقود
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الخميس 20 ديسمبر 2012, 11:34 am

مواصله للموضوع عن الاشياء الاندثرت في الوقت الحالي في منطقتنا باعتبارمنطقتنا احدي المناطق المنطويه تحت المدنيه البدائيه (متين شافو) هنالك بعض الاكلات يبدوانها تلاشت مثل ملاح 47/ السبروق وهو عباره عن صفق الويكه يتم فركه بالمفراكه (النوبودي) زي الخدره ودا من الملاحات السمعنا بيهو سمع 48/ الشوكامسا وهو ايضا من الملاحات البسيطة التكوين يفتونا فيهو ناس عمنا دولا الياس 49/ملاح الكبر دا شفانهو قريب وهو ايضا بدا يتلاشي وهو من نبات الكبر يشبه الجرجير بس اكبر شويه ودايما يقوم جوا الفول والقمح وهو من الطفيليات النباتيه وكان بياكلوهو بالبكه ويكبو ليهو شوية سمن
ومن الحاجات الكان بستعملوها بدل اللحمه في الملاح 50/ الكشنقور وهو عش الغراب بالعربي قالوا كان بطعموا بيهو الملاح والله جنس محن! ومن الحاجات الكان بياكلوها الشفع زمان وهسه بقت من الحاجات القرفه 51/حب النيم ودا كان عندو موسم زيو وزي البلح واكلناهو لامن قلنا بس هسي في شافع بياكل حب النيم 52/ الخرج بضم الخاء وهو ثمرة شجر الخرج شكلها احمر يشبه جنا اللوبه 53/الابرانج غايتو هنا في الخرطوم شايف بقولو ليهو السنمكه وهو نوع من التشق وايضا كنا بناكل الحب منو في رعية البهايم 54/القلوق الكنوسل وهو البلح قبل ماينجض كان ببقي كنوسل ويقع بتدوسو بي ضفرك لو هش معناتا كنوسل وكان عندو ريحه مميزه 55/ الكوهومانج والله غايتو جنس اسماء. دا ظاهر لي المكاده بالجمر بالقندول هسي الحاجات مافي زول بياكلا وبجيب خبرا ساكت وغايتو ناس دولا بكونو عندهم حاجات ما انزل الله بها من سلطان كانوا بياكلوها هسه غرقانين في الكبسه والبيتزا والكلزوني والفخفخينا والقسونقسو
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: ملامح من تراثنا الحديث   الخميس 20 ديسمبر 2012, 12:11 pm

ابوجارو
تعرف عش الغراب باسماؤه الكثيرة ينبت عشوائيا تحت النخل الرطب خاصة النخل المزوع علي حافة الجدول....وهي اكلة عالمية يعرفها كلها الشعوب. السعوديون يسمونها الفقع (بضم الفاء) واجودها عندهم الفقع الجبلي والذي ينمو عشوائيا علي منحدرات الجبال. وجدت في مدينة الرياض سوق يسمي بسوق الفقع وهو مجاور لسوق الطيور. حيث يصل كيلو الفقع الي الفين ريال احيانا. المطاعم اللبنانية ايضا تشتهر بتقديم الفقع مع السلطة بالوان مختلفة ويسميها اللبنانيون المشروع ذلك الاسم الانجليزي الشائع الصيت.
في اوربا ايضا يهتم الناس جدا بالمشروم نسبة لاحتوائه علي بروتينات عالية جدا. المشروم المشوي يكون مذاقه مشابه لمذاق الكبده المشوية كما انه يشابهها شكلا ايضا.
كان قدماء الدناقلة يستخدمون عش الغراب او ود الواطه كما كانوا يسمونها بدلا عن اللحوم. ووجد ان نسبة البروتينات العالية كافية عن الاستغناء عن اللحوم بانواعها. لكن بعض المشروم في الولاية الشمالية فيه بعضا من السموم التي يجب التخلص منها بتعرضه لدرجة حرارة عالية. اليوم الشعوب الوحيدة التي لاتاكل المشوم هي الشعوب السودانية.
اما حب النيم الابرانج (حبوب السنمكة) يقال انها تمنع الديدان الضارة من دخول البطن. لذلك الاجيال التي اكلت هذه الحبوب معافا من ديدان البطن الكثيرة المؤذية

ابو جارو ...قول يالطيف
الرجوع الى أعلى الصفحة اذهب الى الأسفل
شريف عبد المتعال
 
 
avatar

الموقع : ايطاليا
عدد المساهمات : 3796
تاريخ التسجيل : 01/01/2011

مُساهمةموضوع: رد: ملامح من تراثنا الحديث   الخميس 20 ديسمبر 2012, 12:36 pm



متابع معك الحبيب ياسر و كثير مما ذكرت لا أعرفه بصدق القول و فى الأنتظار ....


من فوائد القراءة فتق اللسان، وتنمية العقل، وصفاء الخاطر،

وإزالة الهم ،  والاستفادة من التجارب، واكتساب الفضائل.

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://shareef.forumattivo.it/
رضوان سعيد
 
 
avatar

عدد المساهمات : 201
تاريخ التسجيل : 11/01/2010

مُساهمةموضوع: رد: ملامح من تراثنا الحديث   الخميس 20 ديسمبر 2012, 12:53 pm

ياسر ... والله بوست تونجل وتونجلن داندي .... رجعتنا كم وكمين سنة لي ورا ....
طبعاً من الأكلات الطفيلية المحببة ( البلبلكي ) ودي فطريات تصيب قندول الذره ... ومن الأدوات البتذكرا (الكبروس) و(السُليل) ... وبرضو ( القرر) يستخدم لمنع السخلان من الرضاعة وهو والخرتاية تقريباً واحد يعني ناس البيت لوما لقو (القرر) عادي ممكن يفضوا خرتاية المدرسة ويربطوها للغنماية .. والعكس صحيح.. وبرضو (الكملة) مصنوعة من الشعر ... من الأكلات (الكبى نجي ) وهو القرع وكذلك (الأُقد) وهو ملاح الورق... من أدوات الزراعة (الكون شبر) ولمن زول داير يمسح بيك الواطة شتيمة بقول ليك يا (أوبق) .. و (التُرب) وهو المنجل ... ومن الحشائش (المقسي) .. كذلك (الصرتومونجا ) ... ومن الحشرات (القور ) و(القور كم ) و(الرتيلة) .. (والأمبانقرتود) الذي أفاض الأستاذ ماهر في شرحه في بوست آخر .. .... و(الدونقا دسى) وكان بقولوا أنو لو عضاك ما بيفكك إلا حمار (مصر) يكورك ، لكن ياتو حمار فيهم احدي يوم الليلة ما عرفناه.... (والأشكي) وهو الورل... (والايوكول) .. (والتوصابة)... ومن الطيور (القوكا) و (الفوجا) .. (والدجة) .. و(القيردون) الداجة ... والداجة هو الحوام ... ويمكن لأنو القيردون من الطيور الموسمية.... ونحن هسي كلنا بقينا (داجة) ولا نعود لمراتع الصبا إلا لكي (ندج) مرة تانية ...
شكراً يا ياسر على البوست التوثيقي الراقي ... ويا ريت لو تم تدعيمو بي صور لكل الأشياء التي ترد مع الإسم (بالأندادي) .. حتى يظل هذا التراث محفوظاً للأجيال اللاحقة وخاصة أشياء كثيرة بدأت في التلاشي إلى عالم النيسيان مع الزحف المتسارع لجحافل المدنية.

تقبل مروري..
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الخميس 20 ديسمبر 2012, 2:05 pm

الاستاذ ماهر
بركه ارتاسونقي
والله تراهو الكشينقور ما هو هين معلومات عجيبه
والله طبعا انتو اكثر تجوالا ومن ثم اكتر ثقافه في
النواحي دي طبعا يا استاذ زمان لامن كنا شفع كنا
متخيلين انو مراغه ياها كل الدنيا خلاص لا بريطانا
لا غيرو تقيف في الكروات تعاين لاغربه السما نازله
بعد الديم طوالي تاني مافي حاجه والشمسه بتخش في
نهايه الديم وتطلع شرق السليم بعد شويه لقينا نفسنا
مغشوشين ساكت
يالطيف
الاخ رضوان
والله اتحفتنا بي مشاركتك وكلنا امل ان نلملم كل الحاجات
القديمه ونطرحها للاجيال الجديده ونثبت اننا عجزنا وخرفنا
واصل في ابداعاتك يا سفيرنا
الرجوع الى أعلى الصفحة اذهب الى الأسفل
dr.babikir
 
 
avatar

الموقع : السودان
عدد المساهمات : 780
تاريخ التسجيل : 13/02/2010

مُساهمةموضوع: رد: ملامح من تراثنا الحديث   الخميس 20 ديسمبر 2012, 5:46 pm

الاخ ياسر سلامات وشكرا للبوست الراااااااااااائع
اولا ارجو من كل الاعضاء ينزلو لينا الحاجات البيعرفوها
وانا يا خوي لو ما بعرفك كنت قلت عمرك 85 سنة قدر ناس ماهر والامين وعبدو ديل لكن انا بعرفك كويس
انت بتجيب الحاجات دي من وين يا خوي .وبعدين حتي الواحد لو كبيير داير يفكر وتفكير طويل
لكن الامين ذي ما بيقول عبدالرحمن كروس بيعرف الحاجات دي عشان كدا ما يبخلو علينا
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الخميس 20 ديسمبر 2012, 10:09 pm

شكرا دكتور بكري علي المرور الجميل
وايضا يا دكتور هنالك اعتقادات ندلف لذكرها وهي ايضا من الاشياء المنقرضه انقراضة
الديناصورات منها : انقلاب التيمان الي كدايس او ضبابين حسب حوجة التوم او مزاجو
قالو في مره في توم انقلب كديسه ومشي محل داير ياكل اللحمه ست البيت ضربتو بي الكبشه
في وشو عوقتو لامن صحا الصباح وشو معوق حكي لي امو طول اليوم تداعي في المره
في روايات كتيره زي دي ايضا: انقلاب بعض من الناس لي سحاحير والسحار هو اصلا زول
بقوم ليهو ضنب وشعر في كل الجسم وانياب من اين لا ادري وبعد داك يرجع طبيعي حسب حوجتو
برضو وبرضو في روايات كتيره حول الموضوع :ايضا من الاعتقادات الموهومه لو الزول اكل ملوحه وشرب
لبن يبقي برقا برقا وايضا : الحرمبويه لو عضتك مابتفكك الا الحمار يكورك في مقاصر او مصر زي ماقال رضوان
ايضا: البيوت مابختو ليهم الكمر بدل المرق حتي لو كان الكمر متوفر بحجة انو الكمر بياكل الحيطه يرمي ايضا :الحريم
مايجو جمب المقاد او سرابات العجور اثناء الازدهار تاني مابنجح لو كسرت رقبتك الا ترعاهو : وايضا العريس مايحضر
الجنازه باي حال ولا المره الوالده برضو ماتمشي عليها وانت جاي من جنازه .....الخ ياخي حاجات كتيره مابتتعد زاتو
والله كان زمن.
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأحد 30 ديسمبر 2012, 9:12 pm

مواصله لي موضوعنا بتاع التراث هنالك بعض الالعاب يمكن ذكرها باعتبارها برضو انقرضت
منها مثلا( الشدة) وهي لعبه تعتمد علي القوه ظاهر من اسمها وهي الاعتماد علي رجل واحده
والمصارعه بها وهي رياضه مافي زيها علي الاطلاق ومفيده للجسم وايضا(الدسوسيه) بكمبكوس
علي حسب كلام الرطانين وايضا(الكعوتشل) وهي لعبه قديمه وكانت بالعضم وايضا(السيجه) وهي من لعبات
الذكاء زي الضمنه والكوتشينه لكن بالحجار والحفر وايضا(دق الهدوم) وهي الضرب بي قطعة قماش وايضا
(الكومبليت اشهدونا) وهي بي كرة الشراب والعلب القديمه وايضا ومن العاب البنات (الاريكا) وهي رسم مربعات
علي الارض والحركه داخلها بي طريقه معينه وايضا (ام الحفر) وهي بالحصحاص بي فن الهدنقال وايضا (نط الحبل)
وهناك الكثير اكيد حتخوني الذاكره في ذكرها كلها ولكن يبدو ان العولمه اسرعت الخطي نحو مجتمعنا لتوفر للاجيال
الجديده البلاي استيشن وهوغني عن التعريف طبعا ولكن الملاحظ في الالعاب القديمه كانت بها روح الجماعه والتكاتف
بعكس الالعاب الحديثه ممكن تلعبها براك اليوم كلو زي ما قال عمرين العمده تلقي الواحد مكنكش في المفتاح ويلعب
من غير مايدي الناس التانين معاهو غايتو جنس انانيه.
الرجوع الى أعلى الصفحة اذهب الى الأسفل
رضوان سعيد
 
 
avatar

عدد المساهمات : 201
تاريخ التسجيل : 11/01/2010

مُساهمةموضوع: رد: ملامح من تراثنا الحديث   الإثنين 31 ديسمبر 2012, 12:27 am

اطيب التحايا الاخ العزيز ياسر
اضيف .. من العاب كرة الشراب المشهورة ( اول سيلة) ومن نداءآتها المشهورة ... يا اول كم في الخط ...13 ... كضبا كاضب ..يا تاني كم في الخطه ... 10 ..شد واركب ..ومن قبض عليه يحمل القابض على ظهره حتى الجنكة.. والغريبة ( جنكة) اظنها كلمة انجليزية (جنكشن ) وهي محل التقاء الطرق .. واول ما تجي برلوم جديد لنج في جامعة الخرطوم ...السناير بسألوك عن ثلاث: اللاب ... والاندر لاب ... والجنكشن .. بلاهي فكونا ... نحن جايين نقراء ولا نلعب أول سيلة .. او كما قال ..
من العاب الجلد الصاح بي السفنجة لعبة حكم الشايب في الكتشينة... ومن العاب الجلد الحار بالبونية او اللكامية في الضهر ..لعبة ( الفار دخل بي جماعتو ) .. ( نشي ولا غلوب ) .. وطبعا في ناس كانو حاسدين ولكاميتهم جامدة ..وعينك ما تشوف الا النور...طبعا.. في حاجات كدا ما معروفة هي لعب ولا شغل ..ذي ( الشرك ) .. ومنجاة القماري..والنقطة دي تحديدا محتاجة لي راي الخبرات ..
من الالعاب كذلك ( صفرجت) ...و ( الاربش ) ... و ( تيك تاك ) ...والملاحظ ان كل الادوات المستخدمة في هذه الالعاب مصنعة من مواد محلية. ..ونحن اصلنا من شفع نفك الحيره بي حيره ..
وصباحات الله بي خيرا...
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الإثنين 31 ديسمبر 2012, 8:39 am

الاخ العزيز
رضوان
لك التحيه نرسلها
والله جبت لينا حاجات عجيبه كنا ناسنها مره وحده (يا اول هلبلبلب)(كم في الخط) والجنكة او الجنقه هي في لعبات كتيره زي الدسوسيه برضو والشده وكانو بقولو ليها الميس وايضا كان في لعبه بلعبوها بي حجار البطاريه ويرصوها وتقيف علي بعد كم متر وتضربها وهي لمعرفة مهارة النيشان اسمها الطقش طقش وكلامك في محلو يا رضوان كنا بنفك الحيره بالحيره زاتا لامن الحيره زاتا احتارت اما الشرك والنبله هي تاخد طابع الالعاب اكتر من الحرفه لانو الواحد همو كيف يقبض الطيور وبس وكذلك الجباده لانو لو قبضت ليك سمكه واحده وجبتها البيت غير مقبول اطلاقا (دا شنو ياولد بتعمل الدنيا زفاره ساكت) عشان كده مرات نقبض السمك ونفكو. وبرضو كان في لعبه اسمها ام زنان وهي مكونه من حشرتين زنان + شوكتين سنط+بوصة قصب بتطعن الشوك في ارجل الزنان وتثبتو في البوص بي شوكه تانيه والزنانتين بلفو بي الشوك زي شكل المروحه اليوم كلو مدورين واحيانا بي زنانه وحده .هسي عليكم النبي دي ماحيره

الرجوع الى أعلى الصفحة اذهب الى الأسفل
قدورة الاصلي
 
 
avatar

عدد المساهمات : 200
تاريخ التسجيل : 10/02/2010

مُساهمةموضوع: رد: ملامح من تراثنا الحديث   الإثنين 31 ديسمبر 2012, 9:47 am

شكرا الرائع ياسر ....

واصل من غير فواصل...............


نحنا رحنا عدييييييييييييل مع الحبوبات ديل..........................
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الإثنين 31 ديسمبر 2012, 11:56 am

شكرا الاخ قدورة ع المرور
والله جنس حبوبات
وجنس خرف
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الثلاثاء 19 مارس 2013, 11:18 am

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الثلاثاء 19 مارس 2013, 1:07 pm

يا سلااااااااااااااااااااااااااام والله صوره عجيبه
السعن والكشمبيل وهي ادوات لـ(شكين اللبن) او دق اللبن واستخراج
السمن. والله زمن عجيب .شكـــــــــــــــــــــــــــــــــرا الاخ عبدالرحمن
لإضافة هذه الصوره النادره والمعبره
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الثلاثاء 19 مارس 2013, 5:39 pm

ياسر كتب

يا سلااااااااااااااااااااااااااام والله صوره عجيبه
السعن والكشمبيل وهي ادوات لـ(شكين اللبن) او دق اللبن واستخراج
السمن. والله زمن عجيب .شكـــــــــــــــــــــــــــــــــرا الاخ عبدالرحمن
لإضافة هذه الصوره النادره والمعبره


تحياتي جنابو حصل قلت بان البوست دا لازم يظل مفتوح دائما ولايغادر الصفحه الاولي ونوثق فيه كل الصور النادره
الجميله دي (بالله عليك في احلي من الصوره دي) اتخيل البيت ومدخل التكل بدون باب
وعندي صور بالطريق جميل ان نوثق مثل هذه الصور .. وياريت اي واحد عنده صوره زي دي ينزلها
الرجوع الى أعلى الصفحة اذهب الى الأسفل
saber alqadhi
 
 
avatar

عدد المساهمات : 173
تاريخ التسجيل : 19/10/2010

مُساهمةموضوع: رد: ملامح من تراثنا الحديث   الأربعاء 20 مارس 2013, 12:02 am

جنابو ياسر ..سلامات والله بوست جميل بحق ..بس جلست ساعه عشان اتزكر حاجه ... ما زكروها الاخوان ما لقيت ... كفوا واوفوا ...بس تزكرت الكشنقول ..كنا بنلقه عندنا فى الجنينه ... بى كميات .. على العموم حبت اسجل اعجابى بالبوست ... واتمنى من الاخ عبد الرحمن والاخ الياس ... اتحفنا بالمزيد ... وتقبل مرورى
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الأربعاء 20 مارس 2013, 5:04 pm

تحياتي ياسر وصابر القاضي
نأمل ان نستطيع قدر الامكان ان نعيد شي من الزمن الجميل عبر هذه الاشياء
lماذا تعرف عن "المشلعيب او (السليل او السولل بالرطانه طبعا :

كان له فى زمانه خطوة كبيرة وموقع فى داخل البيت لايمكن تجاهله وهو بمثابة الثلاجة .
أداة مصنوع من سعف النخيل فى شكل بيضاوى يعلق على سقف المطبخ أو ( التكل ) أو الراكوبة بواسطة ثلاثة الى اربعة حبال وتعقد
فى شكل سبكة وتعلق فى السقف
ويستخدم لحفظ الماكولات والألبان وهو بمثابة حماية لها من الكلاب والقطط
والحشرات وحفظاً لها من دخول الجراثيم ومازال هناك يستخدم المشلعيب خاصة فى
المناطق النائية عرفته مناطق دنقلا والشايقية وكردفان والبقارة .. الخ .



[ندعوك
للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأحد 24 مارس 2013, 10:59 am

لك التحيه الاخ عبدالرحمن
الصوره تحمل بين طياتها ماضي
جميل خاصه مع ظهور (الكاناشي) عرضا مع
صورة المعلاق والكاناشي هو الفتحه مابين السقف والحائط
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الإثنين 25 مارس 2013, 10:10 am

[ندعوك للتسجيل في المنتدى أو التعريف بنفسك لمعاينة هذه الصورة]

تقريبا المرحاكه والتي سبقت الرحايه اذا ما كنت غلطان


عدل سابقا من قبل عبدالرحمن نصرالدين في الإثنين 25 مارس 2013, 4:33 pm عدل 1 مرات
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الإثنين 25 مارس 2013, 1:11 pm

لك التحيه الاخ العزييز عبد الرحمن
وانت دوما تغذي البوست بالصور
النادره الصوره اعلاه هي (المرحاكه)
وهي تستعمل في طحن العيش وغيره
وتكون حكرتها من الامام للخلف بصوره
مستمره بواسطة اليدين اما الرحايه فهي احدث
وهي دائريه بنفس حركة الطاحونه الا انها
يدويه.
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الخميس 04 أبريل 2013, 7:02 am

للمواصله حول موضوع التراث وكما ذركنا كانت هنالك ممارسات ومعتقدات راسخه لدي اهلنا في الماضي القريب ولكنها تلاشت مثلا(يا داخل هذا الدار * صلي علي النبي المختار*حجا مبرورا *وسعيا مشكورا*وذنبا مغفورا) وكانت تكتب هذه العبارات علي جانبي البوابه لتنبه الناس بأن صاحب هذا الدار اتي من الحج وكانت تكتب بالظهره بالخط الكبير وكانت كرامة الحاج توازي كرامة العرس. وايضا من الاعتقادات التي اندثرت( اليوب يوب ) و(اندليقي ارحميري) عشا الميتين وكرامة ساتي شريف..ونواصل انشاءالله في شرح المذكور اعلاه في مرات قادمه.
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الخميس 11 أبريل 2013, 12:34 am

من المفارقات ان السبيل في طريقه الي الاندثار [ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأحد 14 أبريل 2013, 11:40 am

السبيل يعد عملا اعمال الخير
التي يدعو لها ديننا الحنيف
وهو مظهر من مظاهر مروءة
اهل القري مثال سبيل(وديسه)
شكرا الاخ عبدالرحمن نحن في
انتظار المزيد من الصور

الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الأحد 21 أبريل 2013, 8:21 pm

اخونا ياسر الحق (السور كا) اتحدي واحد يشوف ليه حبوبه تكون محتفظه بالسور كا
بالتأكيد اصبح من الامس .. والماضي البعيد وتراث[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأربعاء 24 أبريل 2013, 6:58 am

ههههههههههههههه
صوره عجيبه والاعجب منها قروش
الرئيس جعفر نميري (مقنطر عمتو) وقاعد
في العمله ثقه عمياء بالنفس والله ما فاكر في
جورج واشنطون زاتو
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأربعاء 24 أبريل 2013, 7:48 am

ايضا النوريق يعد من التراث وهو النوريق بواسطة مجموعه من الحمير
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   الأربعاء 24 أبريل 2013, 8:00 am

[ندعوك للتسجيل في المنتدى أو التعريف بنفسك لمعاينة هذا الرابط]
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: ملامح من تراثنا الحديث   الأربعاء 05 يونيو 2013, 3:17 am

اخوي ياسر يسعد صباحك
حتي عوامل الطبيعه اصبح من التراث
الكــــــــــــــــــــــــوركــــــــــــــــــــــوتي
متين شفناه [ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
حسينه دياب
 
 
avatar

عدد المساهمات : 149
تاريخ التسجيل : 28/03/2013

مُساهمةموضوع: رد: ملامح من تراثنا الحديث   الأربعاء 05 يونيو 2013, 8:15 pm

التحية لك الاخ ياسر
ارجع بالزمن مرة
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: ملامح من تراثنا الحديث   السبت 08 يونيو 2013, 12:22 pm

هههههههههههه شكرا عبدو
والله الكركوتي صورتو عجيبه خلاص
لو شافوهو ناس مايكروسفت كان نزلوهو ضمن
صور الخلفيات الثابته في الويندوز لاكين مساكين يلقوهو
وين (إساير الوقي؟؟؟)
تسلمي يا حسينه ع المرور الجميل
الرجوع الى أعلى الصفحة اذهب الى الأسفل
 
ملامح من تراثنا الحديث
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  القسم العام -
انتقل الى: