شبكة مراغه الأصاله والتاريخ



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

شاطر | 
 

 مراغة كانت كبيييييرة وبقت صغيرونه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: مراغة كانت كبيييييرة وبقت صغيرونه   الخميس 20 ديسمبر 2012, 3:31 pm

دنيا كبيرة نتجول فيها بحميرنا وترتاراتنا وعرباتنا الحديدية المصنوعة محليا المربوطة بالجريد, او في احسن الاحوال بعجلاتنا الدوبل او الرال الصيني. كونك صبي مفعم بالنشاط لن يغنيك عن ايجاد وسيلة لتنزل تحت للبحر او تمشي حلة بحري او تحمل المناجل وتذهب الي دكان سليمان الحداد (عليه الرحمه) اقصي جنوب البلد (عشان تتطرق المناجل). كانت المسافات بعيدة جدا. المسافة بين الدربوق (شارع الظلط الحالي) واقرب منزل كانت كافية جدا لنا ان نقيم ميدان لكرة القدم. المسافة بين الدربوق ودرب الميري في حلة تحت كانت تستحق ان تفك الحمار من مراحه وتخت السرج وتطلع النيم لتجهيز عصاية للركوبة. حيث اصغر ساقية كان منتوجها مابين هذين الجدولين يكفي لاطعام الحله كلها عام كامل.
حتي الجناين نفسها كانت كبيرة بحيث تنتج من البلح والفواكه لكل المديرية الشمالية. حتي الجناين التي كان يلعب فيها الشباب والصبيان كانت اكبر من دار الرياضة امدرمان. جدول الشركة او جدول جوزيف كانا عبارة عن خورين كبيرين نتعلم فيهما السباحة بحيث ان تعوم بعرض الجدول.
لم يفكر اي منا بالذهاب الي السوق مشيا علي الاقدام (ماعدا الذهايب الي المدرسة) لبعد المسافة. حتي دنقلا نفسها كنا نري ان دنقلا الثانوية او استاد دنقلاعلي مقربة من مدينة الكفرة الليبية.
اما اليوم اذا جلست امام بوابة المرحوم نصر الدين كمثال, ماعليك الا ان تكمش رجليك عند مرور اي عربة بالشارع. مع ان البيت مبني منذ ان كنا صغارا والطريق هو الطريق. نفس الجنية اليوم عبارة عن حوض صغير. نفس الجدول يبدو \لك وكانه جدول ساقية.

لكن عندما نتمعن في قوله تعالي(أَوَلَمْ يَرَوْا أَنَّا نَأْتِي الأَرْضَ نَنْقُصُهَا مِنْ أَطْرَافِهَا وَاللَّهُ يَحْكُمُ لا مُعَقِّبَ لِحُكْمِهِ وَهُوَ سَرِيعُ الْحِسَابِ) (الرعد:41)
اي ان الارض تتنكمش علي نفسها وتتناقص حتي تبدو المساحات صغيرة بمرور الوقت
وهي اعجاز من اعجازات القران الكريم. وقد وردت اية اخري تحكي مايحكيه الكبير للصغير بالمشاهدة عندما يقول المولي:

(بَلْ مَتَّعْنَا هَؤُلاءِ وَءابَاءَهُمْ حَتَّى طَالَ عَلَيْهِمُ الْعُمُرُ أَفَلا يَرَوْنَ أَنَّا نَأْتِي الأَرْضَ نَنْقُصُهَا مِنْ أَطْرَافِهَا أَفَهُمُ الْغَالِبُونَ) (الانبيياء44)
متعنا الله سبحانه وتعالي بمشاهداتنا عند الصغر للارض وخيراتها ومتعنا كذلك بطول العمر حتي نحكي كيف كانت حجم الجنينه الواحدة وحجم البيت الواحد لمن يصغرنا
فياسبحانك
قولوا يالطيف
الرجوع الى أعلى الصفحة اذهب الى الأسفل
dr.babikir
 
 
avatar

الموقع : السودان
عدد المساهمات : 780
تاريخ التسجيل : 13/02/2010

مُساهمةموضوع: رد: مراغة كانت كبيييييرة وبقت صغيرونه   الخميس 20 ديسمبر 2012, 5:19 pm

الخال الغالي سلامات
صدقت والله في كل كلمة قلتها في هذا البوست
والدليل جنينة جدنا الشاويش الوحيييد الكان بيقدر يطلع الكورة من الجنينة بالابي صلاح خالد رحمه الله
وكانوبيقولو الكورة اذا طلعت برة الجنينة تكون سيه .والله نزلت البلد في عرس مالك نصر ونزلت حلة تحت وشفت الجنينة الكانت كبيييييييييييييرة ناس بيلعبو فيها اول خرة وناس يلعبو طاب وبي جهة ناس تلعب شدة ومافي واحد كان يقدر يطلع الكورة في اول دوة وبي الابي برة ليقت الجنينة كلهاااا راقدة في حوضين بتاعين جرجير زارعهم خالو سراج
والله يتذكر قدام بيت ناس المرحوم عبدالحليم عبدالعزيز كان في فسحة كان فيها عرس خالي فقير بين استاذ علاء الدين وواحد معاهو والله انا جاري اكتر من 10 دقائق عشان اصل بيت ناس رفعت عشان اقول لجدي شيخ الدين الحق فرق الشكلة ولمن نزلت لقيت الفسحة ديك كلها ما فيشه ما عارفها مشت وين وذي ما قلت يا خال مراغة بقت صغيييييييييييييييييييرة
ونقول يا لطيف
وقالو بكرة اخر الدنيا
وتاني نقول ياااااااااااااالطيف
الرجوع الى أعلى الصفحة اذهب الى الأسفل
yasir
 
 
avatar

عدد المساهمات : 154
تاريخ التسجيل : 07/07/2011

مُساهمةموضوع: رد: مراغة كانت كبيييييرة وبقت صغيرونه   الخميس 20 ديسمبر 2012, 9:38 pm

الاستاذ ماهر
والله كلامك جد المسافات قصرت والبيوت صغرت ياخي زمان السوق
دا كان بعيد بعد خور كمبوتي دا براهو كان سفر وكان فيهو الرباطيه
كمان من جدول الحميدي للتلاته جداول دي كان مشكله حقيقيه بالليل
الا مجبور لامن سوق البرسيم يكون كعب وتقعد لي بالليل كنا بندس القروش
لكيلا تتعرض للنهب حسب اعتقادنا
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 4:26 am

سلااااامات ابوالوليد د بابكر .. ياسر
ايضا هذه الآيه (افلا يرون انا ناتي الارض ننقصها من اطرافها افهم الغالبون) صدق الله العظيم الانبياء الآيه 44
يرى العلماء ان سبب الانكماش الحقيقي هو خروج الكميات الهائلة من المادة والطاقة في هيئة غازات
وابخرة ومواد سائلة وصلبة. تنطلق عبر فوهات البراكين بملايين الاطنان، بما ينتهي الى انكماش الارض.
ويؤكد العلماء ان أرضنا الابتدائية كانت على الأقل الفي ضعف حجم الارض الحالية، وهذه الظاهرة
(الانكماش - النقصان) للأرض لم تعرف حقيقة علمية كونية الا منذ بضعة عقود، في حين انها ثابتة
في اعجاز مبهر في القرآن الكريم. قبل الف واربعمائة سنة،
أما ما احدثه هذه الظاهره (بمراغه التي اصبحت صغيرونه) يطول الحديث
كثيرا وكما تفضل الاخوه د بابكر وياسر فؤاد من ثرد كنت اتمني ان يواصلوا في هذه الذكريات الجميله
ولا اعلم ان كانوا من جيل واحد ام ابن عمنا عجوز شويه
.. البوست رائع ومبحر .. خاصة بعد زيارة كل الاجيال لابداء
المقارنه والاحداث في الزمن الجميل ولنا عوده




الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 11:22 am

دكتور بكري سلام
المسافة من نخل عمك ابو القاسم جنوب جنينة شاويش حتي نخل حلوم شمال الجنينه لاحظ انها كانت اكبر من بيوت النوري وبيوت ابو الديمي الجديدة التي لم يسكنها احدوكلها غرب الجنينه....يعني مساحتها مساحة سواقي وتحورت الي حوضين جرجير
حتي يوم حش البلح في جنينة شاويش كان الحصاد بيتم في ايام وايام.. وقيزان التمر كانها سواتر ترابية بحيث ان الرؤيا كانت تصعب حتي للكبار خلف قيزان التمر
خور ابو الدايمي نفسه كانت مساحته مساحة افدنه

يادكتور قول يالطيف
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 11:40 am

سعادتو ابو جارو
ذكرتنا خور كمبودي...وهي لمن لايعرف المسافة بين جدول الحميدي شمالا حتي جداول الثلاثة جنوبا. الجداول الثلاثة كانت جنوب محطة البنزين الحالية مباشرة اما جدول الحميدي فمازال شمال النفق مباشرة. كان الخور ملئ بالرمال البيضاء وكان خور فعلي لان الارض كانت منخفضه بحيث انك اتري مابداخل الجناين غربا وشرقا. اول من بني بيت في خور كمبودي كان اخو عبدالهادي ابراهيم ادريس. وكان عمنا لقلق يسكن في المثلث غرب الجداول الثلاثة. وكنا نناديه بلقلق بعد ان تستعد في الركوب بحيث تركب في الجهة الخلفية للحمار , وتضع ارجلك بين رجلي الحمار للحماية من السقوط, ثم تزعط الحمار وتمسك جيبك جيدا حتي تحافظ علي قروش البرسيم. ولن يقف الحمار حتي وصولك جدول الحميدية, وهي مسافة تعادل بحسابات اليوم المسافة من كتمار حتي اول الخناق.
ليست المسافة فقط فقد كانت ارجل الحمير تغوص في الرمال وانت تتلفت يمينا وشمالا خوفا من لقلق والعفاريت

قولوا يالطيف

الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 11:50 am


العزيز عبدالرحمن
السؤال الذي تبادر الي ذهني في مسالة انكماش الارض وصغر حجمها بمرور السنين هو ان سكة حديد السودان تم بناؤه بواسطة كتشنر عام 1821يعني قبل 200 سنة. اذا انكمشت الارض وصغر حجمها؟ مابال السكة حديد لم تنقص قضبانها او حساباتها الطولية؟
اكيد ان هناك اجوبة تصدقها الفيزياء لكن نحن استيعابنا اقل
الشئ الاخر والذي ربما يؤيده العلم ان الارض مثلها ومثل اي مادة تتاثر بالبرودة والحرارة. اي انها تتمدد في الصيف وتنكمش في الشتاء؟
هل هذا يعني ان مساحة الفدان تزداد صيفا وبذلك يزيد الانتاج؟
الاجوبة بالفعل عند اهل العلم... ونعني بها اهل علم الفيزياء
والمؤكد ان كل الاجوبة يساندها الايات القرانية ولاتتعارض معها
لكننا نجهل كل الاشياء لعدم الاطلاع

قولوا يالطيف
الرجوع الى أعلى الصفحة اذهب الى الأسفل
عبدالرحمن نصرالدين
 
 
avatar

عدد المساهمات : 1940
تاريخ التسجيل : 20/06/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 2:59 pm

بعد ان نقول يالطيف يا أستاذ
نجي لشوية حكاوي .. صدق او لاتصدق انا من العصر بدري كنت بشيل هم للمسافه من البيت لميدان الكوره .. وعارف الميدان وين ؟؟ غرب دومات ساتي شريف .. هسي المكان ده فيه بيت كامل خالد ويبعد تقريبا تلاتين خطوه من المسيد سبحان الله مغير الاحوال .. وحتي ساتي شريف ايام (الكرامات) كنا نتفق مع الاصحاب لوقت التحرك لهناك عشان طشت الفته وفليع الدوم .. تعرف . عندنا جنينه قدام بيت المرحوم محمد الامين . كنت بنطف الجدول ده كل 15 يوم من طوله هسي اذا اديتو للوليد ابنك ينطفو في نصف ساعه بالطوريه والقفه .. علي شرط تديه حصة للطوريه والقفه واستعمالهم ..وطبعا معروف خور ابوالدائمي اي زول كان يخاف منو .. بعد المولد في المسيد كنا نطلع ونفرمل جنب الشركه لغاية مايجي المرحوم حاج نصر بالرتينة صحبة حمد سني .. ومرات كنا نقعد اكثر من اربع اوخمس ساعات في الانتظار عشان مانقطع الخور لانه كان عنده غشوه لبيتهم وبيت المرحومين عبدالرسول وعثمان علوبه .. الصباح بدري كثيرا ماكنا نخلي بستلة الشعيريه ولا فتة اللبن بالفطيرة وتقوم جاري للمدرسه ومع كده تلقي الاستاذ صبري منتظرك بسوط النيم .. الواحد يحكي شنو ولاشنو يا استاذ ياخي هيجت فينا الاشجان


عدل سابقا من قبل عبدالرحمن نصرالدين في الجمعة 21 ديسمبر 2012, 9:41 pm عدل 1 مرات
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 4:16 pm

اخوي عبدالرحمن
في اي مرة ازور السودان, يجبرني اخي عامر ان ازور الساقية تحت, وبما ان سواقي دياب طه واحدة الساقية 34 قصاد البيت والاخري هي ساقية طه جوار ساقية جلال احمد, بين الساقيتين اكثر من عشرة سواقي, في الماضي يستحيل ان تمشي المشوار بين الساقيتين مشيا علي الاقدام. لكن المرة الاخري قبل شهور اجبرني عامر ان امشي من الساقية 34 جنوبا مرورا بساقية الارويسي وساقية بشارة وساقية بخيت ابكر وساقية عبدالرحمن الامين ثم ساقية النوري ثم ساقية ابو الدايمي ثم سقية الشمدي ثم ساقية ناس جمال فضل ثم الكمالي ثم ساقية عبده شوده التي تجاور ساقية طه دياب
عزيزي عبدالرحمن
لاتستغرب ان قلت لك ان هذا المشوار لم يستغرق سوي خمسة دقائق بي طرف البحر استمتعت فيها بجذر عمك جمال فضل فوق القيف


قول يالطيف
الرجوع الى أعلى الصفحة اذهب الى الأسفل
مشيرة
 
 
avatar

الموقع : امدرمان
عدد المساهمات : 1276
تاريخ التسجيل : 27/01/2010
العمر : 30

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 7:17 pm

ياسلام كل شوي حلف اقراا البوستات دي بحب قصص الكبار عن ايام زمان والمشاق بتحسسك بحلاوة الحياة بصورة حلوة

ليكم التحية اساتذتي عبدالرحمن وماهر وادامكم الله لنا
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الجمعة 21 ديسمبر 2012, 8:17 pm


شكرا المشيرة علي المرور بي جاي

تعرفي اذا فكر الواحد يجي حلة العمد كان لازم ياخد اجازة عديل كده
كان عدد بسيط من مزارعي كتمار يبيع الخضار او البرسيم في السوق لبعد المسافة

شجرة اللبخ التابعة للمرحوم محمد صالح العمدة كان يجلس عليها كل اهل مراغة من قبلي لي بحري, ومن فوق لي تحت ويظل الظل كما هو


قولي يالطيف
الرجوع الى أعلى الصفحة اذهب الى الأسفل
ياسرابراهيم
 
 
avatar

عدد المساهمات : 466
تاريخ التسجيل : 24/01/2010

مُساهمةموضوع: رد: مراغة كانت كبيييييرة وبقت صغيرونه   السبت 22 ديسمبر 2012, 8:08 am

هذه هي المساحات التي تروي الظمأ وهذا هو الكلام البجيب الطاشي
اسرح استاذنا العزيز ماهر فذكريات ذلك المكان ما زالت نديه وطازجه
نظريا الكل يلاحظ انكماش المساحات القديمه والحبيبه
واغلب ظني ان احساسنا بتلك المساحات نقص بمقدار رؤيتنا وحنيننا الي تلك الايام وتلك الاماكن
كل تغير بفعل الزمن والايام
اكثر ما يقلقني استاذي العزيز هو وليد و(ندايدو)وذكرياتهم وايامهم
فليس لهم ذكريات وحكاوي عن/ساقيه دياب طه ولاخور كمبوتي ولا جنينه الشاويش ولا تدق محمد الحاج ولا دومه تاتا ابراهيم
ولا نيم العمد ولا ولا ولا ولا ابوالزنان ولا القرمديقا ولا القماري
بلاهي بكره حيحكو عن شنو
شكرا ماهر شكرا ابومحمد
[/size]
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   السبت 22 ديسمبر 2012, 9:50 am


العزيز ياسر
(واغلب ظني ان احساسنا بتلك المساحات نقص بمقدار رؤيتنا وحنيننا الي تلك الايام وتلك الاماكن
كل تغير بفعل الزمن والايام
)
الماعندو ماضي ماعندو حاضر....ونحن نشفق علي اولادنا الذين لن يكون لهم ذكريات يغنون عليها...وربما يؤثر ذلك علي طريقة تفكيرهم وعلي ثقافتهم

انا احاول ان اعلم ابني من خلال الصور الحيوانات....ده حمار, ده بقره, ده دجاجه. وعند السؤال يسمي البقره حماره والحماره دجاجه

مع اني في سنه كنت المسؤول الاول عن البهايم في البيت....نرعي الغنم ونحش القش للبقر والحمير ونرجع من الرعية كل دقيقتين تتاوق داخل قفص الدجاج عشان تلقي ليك بيضتين طازجات للفطور... ولو سيادته الدجاج حرن وتغاتت عليك...ماعليك الا الانتظار انشاء الله حتي وقت الغداء
اولادنا البيت يكون مليان كل ما كانت تشتهيه انفسنا زمان...ويقول ليك ماعاوز اي حاجه
جيل بصراحة يستحق الشفقة

قول يالطيف
الرجوع الى أعلى الصفحة اذهب الى الأسفل
هيثم شهلي
 
 
avatar

عدد المساهمات : 599
تاريخ التسجيل : 27/01/2010
العمر : 46

مُساهمةموضوع: رد: مراغة كانت كبيييييرة وبقت صغيرونه   السبت 22 ديسمبر 2012, 8:48 pm

التحيات لماهر وضيوفه الكرام بهذاالبوست الدسم
زي ما قال ابو حباب بمعني يمكن الناس كبرت بس..!
يعني مثالك دا يا دكتور بكري لا يصلح-رغم انه غني الذكريات المحببة- يعني كانت خطوتك قدر شنو زماان مقارنة مع هسع؟؟
والرؤية بعد اتساع التصور من بعيد تختلف وبالاخص لما تشوف رأي العين المدن والقرى والقارات والناس التانيين كلهم
ولكن دا كلو لا يمنع وجود الظاهرة والاحساس بضيق الأمكنة مقارنة بالماضي
ونتابع...
الرجوع الى أعلى الصفحة اذهب الى الأسفل
شريف عبد المتعال
 
 
avatar

الموقع : ايطاليا
عدد المساهمات : 3796
تاريخ التسجيل : 01/01/2011

مُساهمةموضوع: رد: مراغة كانت كبيييييرة وبقت صغيرونه   السبت 22 ديسمبر 2012, 10:14 pm



تسجيل مرور و متابعة


Clap


من فوائد القراءة فتق اللسان، وتنمية العقل، وصفاء الخاطر،

وإزالة الهم ،  والاستفادة من التجارب، واكتساب الفضائل.

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
http://shareef.forumattivo.it/
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الأحد 23 ديسمبر 2012, 12:34 pm

هيثم الحكيم
فعلا تغافلنا عامل الصغر...حيث رؤية الطفل للاشياء تختلف عن رؤية الكبير
كنا نشوف الناس الكبار وكانهم اكبر منا اليوم في اشكالهم
بالرغم من اننا كنا نقطع المسافات كالقطار السريع لكنها كانت تبدو مسافات اكبر من تخيلنا
لكن المفارقة اننا كنا نقطع البحر سباحة-وهيثم كان ضمن سباحين نص النهار- في دقائق معدودات... والبحر اليوم يبدو اوسع من زمان

لااصدق نفسي اليوم عنما اقف في القيف واشاهد الضفة الاخري انا كنا نخوضها سباحة علي الظهر

ربما لو اضفنا عامل الصغر الي عامل ننقصها من اطرافها لزالت الدهشة

قولوا يالطيف
الرجوع الى أعلى الصفحة اذهب الى الأسفل
مشيرة
 
 
avatar

الموقع : امدرمان
عدد المساهمات : 1276
تاريخ التسجيل : 27/01/2010
العمر : 30

مُساهمةموضوع: رد: مراغة كانت كبيييييرة وبقت صغيرونه   الإثنين 24 ديسمبر 2012, 2:21 pm

قصص زمان دي بتحسسك بالانتماء والقرب اكتر ومحبة معرفة الكثير الكثير وبخليك تخت مقارنه كمان جيدة بين هسي وزم
ان
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الخميس 24 يناير 2013, 11:10 pm

كتبت المشيرة

(قصص زمان دي بتحسسك بالانتماء والقرب اكتر ومحبة معرفة الكثير الكثير وبخليك تخت مقارنه كمان جيدة بين هسي وزم
ان)

ونحنا برضو كلما تتذكر تفصيلة من الزمن المضي تشعرنا بالانتماء وتذكرنا مقولة (من نسي قديمه تاه)

قولي يالطيف
الرجوع الى أعلى الصفحة اذهب الى الأسفل
مجدى حسن
 
 
avatar

الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 39

مُساهمةموضوع: رد: مراغة كانت كبيييييرة وبقت صغيرونه   الجمعة 25 يناير 2013, 11:13 am

والله حقايق تعرف خور ابوالدايمى بقى خطوتين بس
حتى بلحكم الحجمو جامبو داك بقى رقشة بس ‏
الرجوع الى أعلى الصفحة اذهب الى الأسفل
وصفية عيسي
 
 


عدد المساهمات : 719
تاريخ التسجيل : 25/05/2010

مُساهمةموضوع: رد: مراغة كانت كبيييييرة وبقت صغيرونه   الأحد 16 يونيو 2013, 10:38 am

]الاخوة الاعزاء لكم التحية وانتم تسردون ايام زمان وحكاويها الجميلة يا حليل ايام زمان ويا حليل ناسوا الطيبيبن العلي قيد الحياة ربنا يديهم الصحة والعافية ومن رحل وسبقنا عليهم الف رحمة
الرجوع الى أعلى الصفحة اذهب الى الأسفل
ماهر عابدين دياب
 
 
avatar

الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: مراغة كانت كبيييييرة وبقت صغيرونه   الإثنين 17 يونيو 2013, 8:46 pm

وصفية عيسي مرحب بيكي وقتما تيسر الدخول
الرجوع الى أعلى الصفحة اذهب الى الأسفل
وصفية عيسي
 
 


عدد المساهمات : 719
تاريخ التسجيل : 25/05/2010

مُساهمةموضوع: رد: مراغة كانت كبيييييرة وبقت صغيرونه   الثلاثاء 18 يونيو 2013, 6:37 am

يا هلا بيك الاخ ماهر وتسلم
 هي الظروف اجبرتنا عن البعاد
الرجوع الى أعلى الصفحة اذهب الى الأسفل
 
مراغة كانت كبيييييرة وبقت صغيرونه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  القسم العام -
انتقل الى: