شبكة مراغه الأصاله والتاريخ



 
الرئيسيةالموقع الرئيسى للشبكةصفحتنا على الفيس بوكالصفحه الرئيسيهالصحف السودانيهالمصحف الشريفالتسجيلدخول

إدارة شبكة ومنتديات مراغه : ترحب بكل أعضائها الجدد وتتمنى لهم أسعد الأوقات بيننا شرفتونا بإنضمامكم لنا ونتمنى مشاهدة نشاطكم ومساهماتكم التي سوف تكون محل تقديرنا واهتمامنا أهلا وسهلا وحبابكم عشرة بين اخوانكم وأخواتكم

شبكة مراغه الأصاله والتاريخ نحو سعيها للتواصل مع أعضائها الكرام فى كل مكان وزمان تقدم لكم تطبيق شبكة مراغه للهواتف الذكيه فقط قم بالضغط على الرابط وسيتم تنزيل التطبيق على جهازك وبعد ذلك قم بتثبيته لتكون فى تواصل مستمر ومباشر مع إخوانك وأخواتك على شبكتنا.

شاطر | 
 

 حوض الاوريق

استعرض الموضوع السابق استعرض الموضوع التالي اذهب الى الأسفل 
انتقل الى الصفحة : 1, 2  الصفحة التالية
كاتب الموضوعرسالة
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق   الأحد 31 يناير 2010, 9:41 am

( يقهرون الموت لأنهم لا يسرفون في الحياه ) نعم سيدي الطيب الصالح هذا هو سر البقاء والدخول في عراك مع تقلبات الزمن والخروج منتصرا دائما ’’’ والدنيا مغارب ،،،
عاشت كل هذه السنوات وهي تنفق البساطه وتكتفي بأقل القليل تأخذ من الحياه ما بار من سلعها اكلا وشربا ونحن ننتزع من دنيانا ما نستطيع أن نأخذه عنوه ونلعن باقي أيامنا وما ضاع منا
أخذت من الحياه ما يبقيها ليوم آخر وتركت باقي الفتات للآخرين يتناوشونه وأنا اقلب نظري في أرجاء البيت الكبير وحوض الوريق يأخذ مكانه في هذه الفوضي أتمني أن أري شيئا يؤكد حقيقه أننا نعيش في القرون العشرينيه فلا أجد ,, كل شئ يبقي في مكانه متشبثا بالماضي ، الازيار،القوسيبه ،برج الحمام كوز الوضؤ.......حتي اللمبه بنيه لا تذيد مساحه ضوئه مقدار تسمح فيها لخطواتها لتتفقد حاجياتها القليله 00
الطيبه والعفويه والقلب الأبيض هم بالتأكيد إكسير الحياه ,,,,
عندما انظر إليها أحس بدف المكان وانو الدنيا ما زالت بخير وان هنالك مستعا من الوقت لكل شئ
اختفت ملامحها بفعل الأيام ولكن ما زالت محتفظه بوسامه السنين كنت دائما اسأل نفسي يا ربي عمتي دي بتشوف بي عيونه ديل كيفن ؟؟؟؟؟ عندما ادفر باب الخشب الكبير وادخل يأتيني صوتها من أقصي ركن في البيت الكبير أهلا يا جناي وتذداد حيرتي وأنا اعقد المقارنه بمدي نظري ونظرتها التي لا تخطئ معرفه الداخلين عليها وهي تخفي الجزء الأكبر من وجهها خلف نضارات سميكه تزيد من قناعتي بعدم الشوف وعمتي لا تخلع نضارتها إلا أثناء الوضوء (استغفر الله توبه) وهي تسكب الماء من كوز الوضوء أمامها
والمغرب لديها هي متعه الصلوات كأن الليل هو خصمها الوحيد الذي يمكن أن يأخذ منها ما تبقي من أيامها لذلك تستعين عليه بمزيد من الدعوات
وكوز الوضوء أمامها لا تستطيع أن تحدد له لونا لا يريد ان يتقدم فيبلي بالصدأ وكثرة الثقوب التي به ولا يتأخر حتي لا يفوق صاحبته وسامه ترافقا كل هذه السنوات يؤدي كل منهم واجبه تجاه الآخر لا يطلب احد منهم المزيد علاقه غريبه لا أجد لها وصفا اكتفي بالسكوت والبحلقه ويديها تدخل الإناء وتخرج تمسح بها باقي شعيرات بيضاء خلفتها السنوات مختفيه خلف الثوب ولسانها يتمتم (اختتمت وضويا واتبعت نبيا علي سنه رسول الله استغفر الله توبه) وعبارات لاافهمها هي خليط من الرطانه وأشياء أخري ولكنها بالتأكيد تفي بالغرض وتوصل الرساله الي حافه السماوات
والدنيا مغارب ,,,,,,,,
وأنا لم أري في حياتي أجمل من مغاربنا لوحه غريبه الألوان والتفاصيل لا تستطيع ان تحيط بكل أبعادها فقط تقف في منتصف البيت الكبير وتحدق في كل الاتجاهات تأتيك أصوات كثيرة متداخله من كل مكان تعزف سيمفونيه مكتمله الجمل الموسيقيه تودع يوم آخر في ذلك المكان الشجي 0
الرجوع الى أعلى الصفحة اذهب الى الأسفل
مجاهد باشنتود
 
 


عدد المساهمات : 180
تاريخ التسجيل : 08/01/2010

مُساهمةموضوع: رد: حوض الاوريق   الأحد 31 يناير 2010, 10:35 am


سلام علي اهلنا في مراغة
مشكور ياسر علي الموضوع
وحمدالله علي السلامه وان شاء في القريب
يرجع سعاده السفير وبقيه الركب
بس داير اعرف علاقه حوض الاوريق بالموضوع ده
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق/عشان خاطرك الغالي   الأحد 31 يناير 2010, 2:16 pm

مااااااااااااااااااااااااااااااافي اي علاقه عزيزنا مجاهد
وانا ذاتي محتار الجاب الحوض ده هنا شنو ؟؟؟؟؟؟؟؟؟؟
بس عشان خاطرك الغالي
كتر خيرك علي المرور والتحيه وانشاء الله تكون جضمّت الامتحانات
الرجوع الى أعلى الصفحة اذهب الى الأسفل
هاني 0العمدة
 
 


الموقع : مراغة
عدد المساهمات : 258
تاريخ التسجيل : 22/01/2010
العمر : 35

مُساهمةموضوع: حوض الاوريق   الإثنين 01 فبراير 2010, 12:28 pm

التحية للاخ الرائع ياسر علي هذة الخاطرة الجميلة 00000نعم هولاء البسطاء اهلنا كما قال الطيب صالح عنهم 00 علي الاقل انهم مازالو احياء رغم الاوبئة والامراض والفقر وفساد الحكام ابننا الرائع مجاهد الظاهر ما فهم رسالتك لكن اعزرو هو لسة ما قرا كتير لازم يقرا موسم الهجرة 00 ومائة عام من العزلة 000والبؤساء عشان يفهم كلامك دة 0000لك العتبي وفي انتظار روايعك
الرجوع الى أعلى الصفحة اذهب الى الأسفل
مجاهد باشنتود
 
 


عدد المساهمات : 180
تاريخ التسجيل : 08/01/2010

مُساهمةموضوع: رد: حوض الاوريق   الإثنين 01 فبراير 2010, 12:37 pm


لك التحية الاخ هاني وتعليقك محل التقدير
بس داير اقول ليك انو قصد ياسر دا مافي
زول بيعرفو الا انا وياسر لانو المبدع ياسر
استخدم في الموضوع مايسمي بالتوريه في
علم البلاغة لانو اطلق العباره(حوض الاوريق) وليها
معنيين واحد بيعرفوا اي زول بيقرا الموضوع دا و المعني التاني
مافي زول بيعرف إلا ياسر
والموضوع دا عندو قصه مع ياسر

الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق   الإثنين 01 فبراير 2010, 4:43 pm

الاحباب
العمده / وباشمهندس مجاهد
حضوركم حتي حافه حوض الاوريق يعني انكم تذوقتم الطبخه جيدا
وابدي كل منكم رايه في زياده او تقليل البهارات
علي العموم مشكورين كتير
اخونا العمده وذي ما قال مجاهد اختيار العنوان كان لطلب خاص وفهم خاص
من هندسه للعنوان والموضوع
وتوجيهاتك بقراءه تلك الدرر تعني مزيدا من التحليق في كل العوالم
وظني ان هندسه حيقلب المكتبات بحثا عن الدرر وحيرجع تاااني لحافه الحوض
ياخي والله كتر خيركم كتيييير
الرجوع الى أعلى الصفحة اذهب الى الأسفل
مجاهد باشنتود
 
 


عدد المساهمات : 180
تاريخ التسجيل : 08/01/2010

مُساهمةموضوع: رد: حوض الاوريق   الثلاثاء 02 فبراير 2010, 12:56 pm

كيف اخبارك ياابو اليسر
داير اقول ليك انو الكتب دي عندي من بدري وقريته
ولو في زول دايره ممكن ارسلا لي في ايميلو وهي نُسخ الكترونيه
الرجوع الى أعلى الصفحة اذهب الى الأسفل
محمد بشير
 
 


عدد المساهمات : 60
تاريخ التسجيل : 10/01/2010

مُساهمةموضوع: رد: حوض الاوريق   الأربعاء 03 فبراير 2010, 10:11 am

عزيزي ياسر
سلامات
الظاهر علي حوض الوريق بتاعك دا استوى علي الاخر
لمن باشنتود وهاني اتزحلقوا من ويكته الزائدة وعلي
ذكر الموضوع اخونا معتصم فحل وهو صغير كان بكره اكل الوريق
تقول ليه لي يقول ليك عشان بشقق الخشم
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق   الأربعاء 03 فبراير 2010, 10:31 am

الاخ محمد بشير
كل التحايا يا دفعه
والله فقعتنا بالضحك والحنكشه علي معتصم فحل ما لايقه عليهو
(قال خشمو بتشقق) بلاهي ،،،،،،،،،،
بالنسبه لي حوض الاوريق الحمد لله اني ما حشيتو كلو
في انتظار باقي الحبايب
الرجوع الى أعلى الصفحة اذهب الى الأسفل
هاني 0العمدة
 
 


الموقع : مراغة
عدد المساهمات : 258
تاريخ التسجيل : 22/01/2010
العمر : 35

مُساهمةموضوع: حوض الاورييق   الأربعاء 03 فبراير 2010, 3:01 pm

الظا هر ياياسر اوريقك دة طابخاهو خادمالله يس ام ابوزوق عشان كدة عندو طعم لذيذ
والتحية لابننا الواعي مجاهد
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق   الأربعاء 03 فبراير 2010, 3:25 pm

يا عمده
انا مصرّ اني ما انزّل الحله دي من النار
حتي يأتي باقي الاحباب ويضوقو
والحوض انا يادووووب حشيت ربعو
اسعدني فيه مشاركتك ومجاهد هندسه والفنجري

تعليقك قمه في الروعه اضحكني حتي سقطت داخل حوض الاوريق
تحياتي
الرجوع الى أعلى الصفحة اذهب الى الأسفل
النور إدريس
 
 


عدد المساهمات : 81
تاريخ التسجيل : 01/02/2010

مُساهمةموضوع: رد: حوض الاوريق   الخميس 04 فبراير 2010, 11:07 am

حبيبنا ياسر جيت جارى ومقلع شباطاتى عشان الاوريق مايكمل وخصوصا الليله انحنا فى برد ام شير والقراريص ما قادره تلحق
الموضوع جميل ومؤثر والناس فى بلادى تحسبهم من التعفف اغنياء وياريت كلنا كنا زيهم فى البساطه حتى انو يكون للحياه معنى
لك اشكر وحاجى تانى بعد الحله تبيت يوم يوم يها نكهة البياته
الرجوع الى أعلى الصفحة اذهب الى الأسفل
مجدى حسن
 
 


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 38

مُساهمةموضوع: رد: حوض الاوريق   الخميس 04 فبراير 2010, 1:24 pm

الاخوة محمد بشير / ياسر / هانى/النور /مجاهد
واللة ماقصرتو وياهانى حريشك لمجاهد دة بقد جيبنا كفاية مراجع الجامعة

والله ياياسر شدة مازهجت من زحمة الشغل خشيت الموقع وشبعت وريق وسلطة والنور جوعنا اكتر

لكم التحية ويايريت ياياسر تفت لينا القصة ولو مافى قصة تالف لينا وحدة

تحياتى
مجدى
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: حوض الاوريق   الخميس 04 فبراير 2010, 3:05 pm

ابادول
شكرا كتير بطعم الاوريق وجيتك مفروق منها حتي لو كانت اللمه بي البيتزا
ووصفك لانسان بلادي بالتعفف ذلك ما اردت ان اصل اليه من خلال الموضوع
لك خالص المحبه وكتير التحايا

باشمهندس مجدي
مافي قصه معينه بدا الامر عندما التقينا انا ومجاهد من خلال الاميلات
وقبلها وجدني في موقع دنقلا
وبعد السلامات والاشواق سألني عن الغياب في منتدي مراغه بعد التجديد
وقلت ليهو الجميع في حاله كسل والموقع بعد التجديد بي لونو
الاخضر دااااك بقي عامل ذي حوض الاوريق !!!!!!
وكان الوعد مني ان نلتقي في المنتدي من خلال موضوع جديد
والخربشات كانت عاديه من خلال البيت الكبير والمغاااارب
وحتي افي بوعدي لي هندسه حشرت العنوان ده حشر
هندسه احترم وفائي بالوعد ووقع بالحضور بكلمات انيقه
بعد داك عينك ما تشوف الا الاوريق
لقيت ليك العمده داخل توووووش في هندسه
وهندسه يسن مفاتيح الكي بورد ويرد شي عربي وشي حساب
ودخلت انا اشرح للعمده سر العنوان
والفنجري جانا ناطي مستفسرا عن زياده الويكه والزحلقه بين هندسه والعمده
وحاول ان يثبت عمليا انو الاوريق بشقق الخشم
وقلنا ليهو بالدليل القاطع لو كان الامر كده كان خشمنا بقي مصفي
المهم يا هندسه اطمنك الجميع بخير وكلهم اخذ نصيبه من القراصه
وانا خليت حبه في قعر الحله وحبه في طرف الحوض
لي ناس حبايب انا متاكد انهم جااااااييييين ,,,,,,, عاطر التحايا والسلامات
الرجوع الى أعلى الصفحة اذهب الى الأسفل
أسامه السر
 
 


عدد المساهمات : 148
تاريخ التسجيل : 26/01/2010

مُساهمةموضوع: رد: حوض الاوريق   الجمعة 05 فبراير 2010, 6:24 am

[ندعوك للتسجيل في المنتدى أو التعريف بنفسك لمعاينة هذه الصورة]
الرجوع الى أعلى الصفحة اذهب الى الأسفل
هاني 0العمدة
 
 


الموقع : مراغة
عدد المساهمات : 258
تاريخ التسجيل : 22/01/2010
العمر : 35

مُساهمةموضوع: رد: حوض الاوريق   الجمعة 05 فبراير 2010, 8:21 am

ياياسر نحنا كنا قاصدين ناس مجدي ورضوان ديل يتوضعوا وياكلو معانا الاورييق دة فاضل رضوان نخلي ليهو باقي الحلة
ياربي ناس مجدي والجعلي حريمهم بيقدرو يعملو اوريق؟
الرجوع الى أعلى الصفحة اذهب الى الأسفل
محمد جعفر
 
 


الموقع : مترحل
عدد المساهمات : 533
تاريخ التسجيل : 08/01/2010
العمر : 27

مُساهمةموضوع: رد: حوض الاوريق   السبت 06 فبراير 2010, 3:27 pm

آبا ياسر لك التحية .... وربنا يديك الصحة والعافية
مشكـــــــــــور كتير كتير كتير كتير كتير كتير كتير
مشكـــــــــــور كتير كتير كتير كتير كتير كتير كتير
مشكـــــــــــور ( ده كلو حنك ) كتير كتير كتير
مشكـــــــــــور كتير كتير كتير كتير كتير كتير كتير
حسبتونا في الحلة دي ولا ننتظر الحلة الجايا
الرجوع الى أعلى الصفحة اذهب الى الأسفل
مجدى حسن
 
 


الموقع : الدوحة - قطر
عدد المساهمات : 752
تاريخ التسجيل : 10/01/2010
العمر : 38

مُساهمةموضوع: رد: حوض الاوريق   الأحد 14 فبراير 2010, 12:25 pm

ماعندنا ليك رد ياهانى غير نقول ليك اتفضل قراصة ملوحة

اول جمعة من كل شهر
الرجوع الى أعلى الصفحة اذهب الى الأسفل
نضارالعمده
 
 


عدد المساهمات : 295
تاريخ التسجيل : 17/01/2010

مُساهمةموضوع: رد: حوض الاوريق   الأربعاء 24 فبراير 2010, 9:25 am

[


عدل سابقا من قبل نضارالعمده في الجمعة 19 مارس 2010, 11:14 am عدل 1 مرات
الرجوع الى أعلى الصفحة اذهب الى الأسفل
شهاب سعيد
 
 


الموقع : المملكة العربية السعودية
عدد المساهمات : 755
تاريخ التسجيل : 08/01/2010

مُساهمةموضوع: رد: حوض الاوريق   الأربعاء 24 فبراير 2010, 9:49 am

الطيب صالح - أو "عبقري الرواية العربية" كما جرى بعض النقاد على تسميته- أديب عربي من السودان، اسمه الكامل الطيب محمد صالح أحمد. ولد عام (1348 هـ - 1929م) في إقليم مروي شمالي السودان بقرية كَرْمَكوْل بالقرب من قرية دبة الفقراء وهي إحدى قرى قبيلة الركابية التي ينتسب إليها، وتوفي في أحدي مستشفيات العاصمة البريطانية لندن التي أقام فيها في ليلة الأربعاء 18 شباط/فبراير 2009 الموافق 23 صفر 1430 هـ. عاش مطلع حياته وطفولته في ذلك الإقليم، وفي شبابه انتقل إلى الخرطوم لإكمال دراسته فحصل من جامعتها على درجة البكالوريوس في العلوم. سافر إلى إنجلترا حيث واصل دراسته، وغيّر تخصصه إلى دراسة الشؤون الدولية السياسية.

وتحاياتي لكم جميعا
تخريمه :-
والله انتو ناس خاييين ما لكم ما عزمتونا فى الحله بتاعت الاوريق دي
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الأربعاء 24 فبراير 2010, 5:56 pm

مرحب بيك يا دكتورة
رغم حضوركم والاخ شهاب بعد ملاح الاوريق ما ،،،،،، كووشّن ،،،،،
لكن حبابكم الف
لينا اكتر من شهر نطلّع وننزّل الحله من النار
واللمه اذدانت بي احباب كتييرييييييين ذانو تلك الايام النديات بغالي ذكرياتنا في البلد الحبيب

وكل مرة اتاوق علي الباب منتظرين جيتكم الغاليه

وبيني وبين النذير العمده يا دكتورة قهقهاااااااااات من حد حلتنا الي حله العمد
الرجوع الى أعلى الصفحة اذهب الى الأسفل
dr.babikir
 
 


الموقع : السودان
عدد المساهمات : 780
تاريخ التسجيل : 13/02/2010

مُساهمةموضوع: رد: حوض الاوريق   الأربعاء 24 فبراير 2010, 8:29 pm

ابن خالي الغالي والله شكلو حلتك دي بايرة لانوا الدنيا شتا والاوريق كتير لكن حوضك كبير وموضوعك رائع ومشكوووووور علي العزومة لاننا كلنا بقينا نفتش في اوريقك دا ربنا يكتر منو مع بورتو دي ويخلييييك وتعمل كمان حلة كداد وتزيدنا علم فيه كمان وكمان ويخلي ناسنا ملمومين ومتحابين ومتقاربين مش حلة اوريق دايرة تفرتقم
الرجوع الى أعلى الصفحة اذهب الى الأسفل
مشيرة
 
 


الموقع : امدرمان
عدد المساهمات : 1276
تاريخ التسجيل : 27/01/2010
العمر : 29

مُساهمةموضوع: رد: حوض الاوريق   الخميس 25 فبراير 2010, 8:31 am

يديك العافية ياسر موضوح حلو

وحلة الاوريك دي اقسم لينا منها مع الجماعة ديل ههههههههههه
الرجوع الى أعلى الصفحة اذهب الى الأسفل
نضارعبدالكريم العمده
 
 


عدد المساهمات : 1064
تاريخ التسجيل : 01/09/2010

مُساهمةموضوع: رد: حوض الاوريق   الثلاثاء 30 نوفمبر 2010, 7:02 am

الطيب راوية وعلامة انساب اديب رضع من صهيل الامواج من امواه معتقة ممزوجة بسحر الفراعنة وزنارات الهة الهوى فى فسطاط مروى واضرحة الفونج وقباب السلطنة الزرقاء عاش طفولة مليئة بالحيوية والنشاط امتلات ذاكرته باقاصيص الجدات وحكاياتهن من خلال مجالس الانس واسمار العشاء الدسمة والرطبة الطيب كان سودانيا فى كل شىء عبر عن مجتمعه بشفافية وصدق متناهى نقل فى رواياته الحياة السودانية بكل تفاصيلها...وكنت ان استجلبته معك فى كل متكأ ومجلس ..وفى صالونك الانيق حكاوى البلد وعلى ظلال النخيل وعلى اطراف حوض الاوريق..وكنا نتمايل طربا على كلامك وسردك وبينكما شبه وفى كل كلماتكما عذوبه..وطلنا ان تثقفنا اكثر ونسافر ونرتحل عبرك الى الطيب ليعبر بنا المسافات الجميله ..لنتعمق فى الريف والبداوه وقيم مجتمهنا الريفى وفى نهاية هذا الطواف نتغذى على لقيمات من قراصة اوريق حاااار ومعاهو صحن بصل ...
عد الينا............
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الثلاثاء 30 نوفمبر 2010, 9:18 am

تعاودك بعض الايام هنا يا دكتوره تحس فيها بالكسل النفسي بالكاد تمد يدك لتتناول كوب الشاي وبصعوبه تفر اسنانك لترد التحيه وتفتح عينك نصف فتحه لتتبين الطريق
الا ان كلماتك المترفه بحنين الاخوات انتزعتنا من كل ذلك ففرقعنا اصابعنا وفتحنا خشمنا علي آخره وعيوننا تتسع لتري كل السطور
قالوا الكثير عن الطيب الصالح (عليه الرحمه) لكنهم ما سمعوا وهم يهيلون عليه التراب انه (كان سودانيا في كل شئ) فالعباره ماركه مسجله ليك
شكرا لسؤالك اختنا الدكتوره فعندما طل علينا حوض الاوريق مره اخري بدت لي المراعي أكثر خضرة في الجانب الآخر من الوادى
وعدنا لنرد التحيه
الرجوع الى أعلى الصفحة اذهب الى الأسفل
نضارعبدالكريم العمده
 
 


عدد المساهمات : 1064
تاريخ التسجيل : 01/09/2010

مُساهمةموضوع: رد: حوض الاوريق   الثلاثاء 30 نوفمبر 2010, 10:36 am

هلا نورت ولو كنا عارفين نقدر نجرك من مخباءك كنا عملنا من قبيل
وللامانة والصدق ..هذا الكلام الذى قيل فى حق الطيب صالح لم يكن ماركة مسجله لى (الجزئيه الاولى) وخصوصا جملة كان سودانيا فى كل شئ هى من حق الكاتب عبدالله صالح يسن .
ولكن نقول كقوله نعم كان سودانيا فى كل شئ...
همسه (انت وحكيم القرية لو عملتو تشارك حتكونوا فلترون عجيب)كدى جربو!!!!!!!!
الرجوع الى أعلى الصفحة اذهب الى الأسفل
رضوان سعيد
 
 


عدد المساهمات : 201
تاريخ التسجيل : 11/01/2010

مُساهمةموضوع: رد: حوض الاوريق   الثلاثاء 30 نوفمبر 2010, 11:50 am

ياسر الحبيب .... سلامات .....
الشكر للدكتورة التي نفضت عنك غبار الكسل...
نحن في إنتظار أن ترد التحية بأحسن منها..
الرجوع الى أعلى الصفحة اذهب الى الأسفل
mohammed alzaki
 
 


عدد المساهمات : 53
تاريخ التسجيل : 11/01/2010

مُساهمةموضوع: رد: حوض الاوريق   الثلاثاء 30 نوفمبر 2010, 12:07 pm

يا اخوتى المشكله انو اخى ياسر مابياكل الاوريق
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الثلاثاء 30 نوفمبر 2010, 2:04 pm

الف مرحب يا دكتوره
انا والحكيم دفعه من ايام دنقلا الثانويه وذكريات كثيره مع اخونا عادل محمد عبدالواحد
ومقدمه برنامج الصلات الطيبه
يا لتلك الايام
يا ليتنا عدنا او عادت الايام

رضوان سفيرنا الحبيب
كتير الاشواق والسلامات وعامل كيف في الصقيع داك
فما ابعد المسافه يا عزيزي ما بين احراش كتي مار وبرلين
تحياتي للاسره الصغيره

جدو الغالي
نحن ابعد ما نكون عن الحنكشه
اوريق شنو نحنا اكلنا الابورانج
تحياتي
الرجوع الى أعلى الصفحة اذهب الى الأسفل
نزير العمده
 
 


عدد المساهمات : 127
تاريخ التسجيل : 13/09/2010

مُساهمةموضوع: رد: حوض الاوريق   الثلاثاء 30 نوفمبر 2010, 6:28 pm

الاستاذ يا سر حقبقه كلما اجي اكتب تجري الحروف وما ترجع من الاستمتاع والضحك لاني كلما ادخل علي حوض الاوريق اتذكر عمنا تاج الختم وما فعله بحلة الاوريق في بيتهم عندما عرف انو البنات مشو تحت وجابو من اوريقو . عودا حميدا ياحبيبنا
الرجوع الى أعلى الصفحة اذهب الى الأسفل
محمد بشير
 
 


عدد المساهمات : 60
تاريخ التسجيل : 10/01/2010

مُساهمةموضوع: رد: حوض الاوريق   الأربعاء 01 ديسمبر 2010, 9:38 am

اخي ياسر لك اجمل وارق التهاني ووالله مشتاقين
من هنا عاوز ارسل ليك شكر للامورة حباب ياسر (كما تشتهي بنتي الصغيرة روان بان تناديها وتنادي اي واحد من بيت محمد عوض سيداحمد باسمها) لتعلقها الشديد بيها لحضورها الانيق ابان زواج الاخ عبد المنعم ظاهر عليها بت اصيلة وما جرت ناس بحري الجدول هههههههههههههههههههههه (( دائما توقعنا في المشاكل انت ))
يا اخوي عاوزك ترشدنا علي تيراب وريقك دا من وين تم الحول ولسع ضارب الجزور في الارض القصة شنو ؟
الرجوع الى أعلى الصفحة اذهب الى الأسفل
الباقر عكاشة
 
 


عدد المساهمات : 198
تاريخ التسجيل : 17/05/2010
العمر : 52

مُساهمةموضوع: رد: حوض الاوريق   الأربعاء 01 ديسمبر 2010, 12:36 pm

القطر فيه مفتش شكلك يا يا ياسر حتأكل بنتنا أوريق وبدل ماسوره مويه حيكون كوز وضوء
وبدل لمبه 4قدم حيكون فانوس - بالله كيف أخبارك وتلفوناتك اتقطعت ولا المهمه انتهت
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الأربعاء 01 ديسمبر 2010, 3:47 pm

الاخ النزير
مع اني ما عارف تاجو عمل شنو في حله الاوريق الا اني ما قادر امنع نفسي من الضحك لاني متخيل الوضع كيف مع تاجو
الف شكر لحضورك جوه الحوض يا عمده

ابوروان عاطر الاشواق
الف مبروك للعزيز عبدالمنعم وبيت مال وعيال وارجو ان تصله تهانينا
والاميرات روان وحباب هم امل ان يتحول الجدول يوما دائريا يلف كل البلد ويجعلها في النص
ويجبروننا علي نط الجدول في كل الاتجاهات
نسيت اقول ليك انو الاوريق نبت من جديد وشغالين فيهو حش تااااني

ابو الزاكي كتير التحايا والسلامات
المهمه لن تنتهي فحبل الموده قديم وكبير وانت سيد العارفين
عدت يوما الي البيت وبجانبي وجبه ماكدولانذ وقبل ان اصل رن تلفوني وكانت المكالمه من البيت
(( لو قريب من المطعم السوداني جيب لينا معاك خدره !!!!!!!!!))
ديل ناس تبو ناس الاوريق واللمبه بنيه وكوز الوضؤ
تحياتي للاسره الكريمه
الرجوع الى أعلى الصفحة اذهب الى الأسفل
الباقر عكاشة
 
 


عدد المساهمات : 198
تاريخ التسجيل : 17/05/2010
العمر : 52

مُساهمةموضوع: رد: حوض الاوريق   الخميس 02 ديسمبر 2010, 1:18 pm

عند بدايه حياه عطا الزوجيه كان دائما ما يحضر لطفلته الصغيره شزى
ماكولات معلبه - لبشكرى - مربى وجبن فاحتجت الخاله امد الله فى عمرها
مخاطبه عطا - يا أطا تانى ما تجيب الهلس بلس تانى للبت ده واظنها يا ياسر طلعت
لحبوبتها وبدل وجبه ماكدونز تختار الملوخيه -وما تزودها يا ياسر وتقول لينا لمبه بنيه
انا شفتها شايله نجف
الرجوع الى أعلى الصفحة اذهب الى الأسفل
اسماعيل عبد الحميد
 
 


عدد المساهمات : 65
تاريخ التسجيل : 30/11/2010

مُساهمةموضوع: حوض الوريق   الجمعة 03 ديسمبر 2010, 8:06 am

يا اعزالناس حبايبك نحن زدنا قليل حنان...داالعمرزادت غلاوته معاك وصالحني الزمان..لماالرسايل كانت بالموبايل..اتحفتني يا ابو حباب..وعلي راي مختار دفع الله(ويااحليل ايام عيونك كان بتلهمني المسره)واليوم حروفك اضحت ملك لكل الناس.. وهنا انابسجل اعتراف مفاده (اني في حبك اناني)..الحبيب ياسر..انا لي يومين بقرا في روائعك(وبرضي شاعرماكفاني)عموما (ياما عندي معاكا كلاااام).بس كلام محمدبشير زكرني التجاني ايام الصغر كان بقول (للرجله)(ملاح الكرعين)وحوضك ده خلي هاني ومجاهد..واحد يورق والتاني يفرك..والانتاج لابزوق وتاجو ولك السيناريو وروعة الاخراج يا ملك الحروف
الرجوع الى أعلى الصفحة اذهب الى الأسفل
مجاهد باشنتود
 
 


عدد المساهمات : 180
تاريخ التسجيل : 08/01/2010

مُساهمةموضوع: رد: حوض الاوريق   السبت 04 ديسمبر 2010, 12:54 pm

التحية والتقدير الي الاخ اسماعيل عبد الحميد
والله منور حوض الاوريق
ويكفي انو سمعة لحق الحوض وهو اول الناس
اللحقو بعد بدا ينبت
ياسر منتظرين منك حاجة بمناسبة دخول سمعة للشبكة العنكبوتية
طبعا في العيد لاقيت سمعة وقال لي الـHP وصل انا جاييكم قريب
واتزكرت كلامك ياياسر لمن قلت سمعة لوجا تاني نحن ماحنلقي فرقة
وتاني منووووور ياسمعة
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   السبت 04 ديسمبر 2010, 5:12 pm

في دنيانا نحنه نعيش وما همانا
لما تفوتنا لحظه جميله
اجمل لحظه تستنانا
واللحظات الرائعات جات بي مقدمك سمعه يا غالي لتجعل للمنتدي طعم جديد

لم انسي ضؤ القمر في اجمل ليالي
وشعاع النجوم يبهر كالالئ
ونحن نتسامر في جنينه بيتكم والاحباب حضور
والود شغاااااااااال
يا سلاااااااااااااام
اوعك تمشي من هنا تاااااااااني يا سمعه والف مرحب
الرجوع الى أعلى الصفحة اذهب الى الأسفل
عبدالرحمن نصرالدين
 
 


عدد المساهمات : 1938
تاريخ التسجيل : 20/06/2010

مُساهمةموضوع: رد: حوض الاوريق   الأحد 27 مايو 2012, 7:10 pm

من ابداعااااات اخوكم الاديب ياسر ابراهيم
الرجل الذي يعشق الجمال ويمتهن روعة الكلمه
بالله عليكم الا تستحق هذه الكلمات ان نعيدها الي الواجهه كلما ابعدتها خطرباتنا خاصة هذه الايام
ياسر يقول
كل شئ يبقي في مكانه متشبثا بالماضي ، الازيار،القوسيبه ،برج الحمام كوز
الوضؤ.......حتي اللمبه بنيه لا تذيد مساحه ضوئه مقدار تسمح فيها لخطواتها
لتتفقد حاجياتها القليله

الله يديك العافيه ياود الشيخ (خليك قريب) قدر الامكان



[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذه الصورة]



[ندعوك للتسجيل في المنتدى أو التعريف بنفسك لمعاينة هذه الصورة]


الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الإثنين 28 مايو 2012, 4:57 pm

عبدالرحمن نصرالدين كتب:
من ابداعااااات اخوكم الاديب ياسر ابراهيم
الرجل الذي يعشق الجمال ويمتهن روعة الكلمه
بالله عليكم الا تستحق هذه الكلمات ان نعيدها الي الواجهه كلما ابعدتها خطرباتنا خاصة هذه الايام
ياسر يقول
كل شئ يبقي في مكانه متشبثا بالماضي ، الازيار،القوسيبه ،برج الحمام كوز
الوضؤ.......حتي اللمبه بنيه لا تذيد مساحه ضوئه مقدار تسمح فيها لخطواتها
لتتفقد حاجياتها القليله

الله يديك العافيه ياود الشيخ (خليك قريب) قدر الامكان

ابومحمد
وقد ادمنت تنكت في القديم
خليتني ارجع واقرا من جديد ولقيت الكلام طاااعم
والواحد بقي ما بضوق طعم الكلام ده الا بعد ما تجي وتوقع لينا
عايز اسألك انت كنت وين وكت اللمه دي؟؟؟؟؟؟؟
الرجوع الى أعلى الصفحة اذهب الى الأسفل
ماهر عابدين دياب
 
 


الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: حوض الاوريق   الثلاثاء 29 مايو 2012, 3:17 am


انا متاكد انه حوض الاوريق ده انا مليت منه قفه...لكن فتشت في الردود مالقيت نصيبي
اعتقد سيفته في الكمبيوتر لغاية ماخمر وعمل ريحة بدل ومشي السلة بدل مايمشي للمعدة عديل
تعرفوا انا خليت مضمون الكلام الجميل ده وركزت في حوض الاوريق واتخيلت خمورية (بكه) مع الاوريق
والدخاخين طالعة خاصة عندنا البرد يلحم
صدقوني يااخوة لو كنا بنعرف نسوق حاجاتنا كان لقيتوا مطاعم اوريقدونالدز واوريقتاكي وبيتزا اوريق وهلم جرا
اللهم احفظ كبارنا وبلغهم العافية

قولوا يالطيف
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الثلاثاء 29 مايو 2012, 6:23 am

انا متاكد انه حوض الاوريق ده انا مليت منه قفه...لكن فتشت في الردود مالقيت نصيبي
اعتقد سيفته في الكمبيوتر لغاية ماخمر وعمل ريحة بدل ومشي السلة بدل مايمشي للمعدة عديل
تعرفوا انا خليت مضمون الكلام الجميل ده وركزت في حوض الاوريق واتخيلت خمورية (بكه) مع الاوريق
والدخاخين طالعة خاصة عندنا البرد يلحم
صدقوني يااخوة لو كنا بنعرف نسوق حاجاتنا كان لقيتوا مطاعم اوريقدونالدز واوريقتاكي وبيتزا اوريق وهلم جرا
اللهم احفظ كبارنا وبلغهم العافية

قولوا يالطيف



استاذي ماهر
ولو كنا فعلا نعرف مثل باقي الشعوب نسوق لحاجاتنا لكان حالنا غير ذلك ولله الحمد
فما اروع اللوحه الاماميه لمدخل المطعم الشهير اوريقتاكي بناصيه داون استريت
وقد توسطتها خموريه بكه
الف مرحب سيدي الاستاذ
الرجوع الى أعلى الصفحة اذهب الى الأسفل
عبدالرحمن نصرالدين
 
 


عدد المساهمات : 1938
تاريخ التسجيل : 20/06/2010

مُساهمةموضوع: رد: حوض الاوريق   الثلاثاء 29 مايو 2012, 12:59 pm

الاعزاء ياسر وماهر
الموضوع فعلا الواحد يملا منو قفته حتي ولو خارج الشبكه او بجانبه قليلا زي ماقال مجاهد
الموضوع فيه توريه .. والسجال بين مجاهد وهاني رائع ومداخلة .. احد الغائبين المبدعين الفنجري
اروع عندما ذكر (هاني ومجاهد ازحلقوا في ويكته الزائده) الاروع اكثر زوغانات ياسر من الاقتراب وتعريف
مضمون الموضوع تاركا الامر لاجتهاد الناس
استاذ ماهر لماذا لانسمع ن بي اوريقدونالدر تيمنا بمقدونالدز في يوم من الايام .. بالله عليكم الله (خمورية بكه
حولوها لبوست ياسر فؤاد .. واااااااااااااااااأسفاه ان يتحول خموريه بكه الي تراث ... عن سؤالك اخي ياسر
عايز اسألك انت كنت وين وكت اللمه دي؟؟؟؟؟؟؟
وكت اللمه دي انا عندي حساب بالفيس بووك وكل يوم والتاني .. مالك نصرالدين يقول لي ياخي انت حكاية
شنو ماتدخل منتدي مراغه .. قلت ليه ماسمعت بمنتدي مراغه .. قال لي بس ادخل شوف .. وغلبني ادخل
كل مااسجل القي المشكله الحاصله لماهر وقرشي هذه الايام (معلوماتك مش عارف ايه ) الي ذهبت لزيارة
للقويعيه لمالك وسجل لي تعرف موضوعك ده نهاية يناير 2010 وانا شرفت المنتدي بعد عشره اشهر من هذا
التاريخ في اكتوبر 2010 .. عشان كده ماحصلت حوض الاوريق



[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذه الصورة]



[ندعوك للتسجيل في المنتدى أو التعريف بنفسك لمعاينة هذه الصورة]


الرجوع الى أعلى الصفحة اذهب الى الأسفل
الأمين الياس الأمين
 
 


عدد المساهمات : 604
تاريخ التسجيل : 16/01/2011

مُساهمةموضوع: رد: حوض الاوريق   الأربعاء 30 مايو 2012, 2:49 am


سبحان الله يا جماعة .. عبدالرحمن نصر الدين - بعد سنتين فتح حلة الأوريق وجيت أنا بالريحة (حلة كشي بو) لكن الحمد الله الرزق ما بفوت سيدو
عبدالرحمن - خلي لي شوية .. نقشها بحتة (تميسة) ما عندنا خمورية بكة
ياربي ناس هناية بعرفوا يفركوا الأوريق ؟؟؟؟؟ ما مشكلة حتى لو بي مفراكة الكهرباء يا هناية
أصلو من يوم ما اختفت (بكة جقري) من الدوكة .. وظهرت (بيتزا هوت) بقت حلة الأوريق من التراث
سجل يا ياسر فؤاد ...حباب أبو حباب - بالنيو لوك
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الأربعاء 30 مايو 2012, 9:28 am

ابادول سلامات ياخي
والنكته تقول/
زمن المجاعة و النازحين وصلو لحد الخرطوم , رباطابي فارش ليهو نبق , جاهو واحد من الجماعة النازحين و قال ليهو النبق بي كم / الرباطابي رفع راسو لقاهو عريان زي أمو ما ولدتو ,,, قاليهو النبق خلو انت قروشك خاتهن وين !!!
هسه حله اوريقنا وعبدو ده خليهم انت كنت وين ؟؟؟؟؟

حباب أبو حباب - بالنيو لوك
عشان جنس النضم ده كنا خالينها فاضيه
الف مرحب
الرجوع الى أعلى الصفحة اذهب الى الأسفل
الأمين الياس الأمين
 
 


عدد المساهمات : 604
تاريخ التسجيل : 16/01/2011

مُساهمةموضوع: رد: حوض الاوريق   الأربعاء 30 مايو 2012, 10:15 am


وحاتك يا ابو حباب
ما شفتا الحلة لحدى ما عبدالرحمن جاء وفتحا ,, انتا بحلة الأوريق , وماهر
بالخمورية البكة - وقلتا نلحق حتة بالتميس
طبعا أنا عارف سبب ( النيو لوك) مش كدا برضو ؟؟؟؟؟
الرجوع الى أعلى الصفحة اذهب الى الأسفل
عبدالرحمن نصرالدين
 
 


عدد المساهمات : 1938
تاريخ التسجيل : 20/06/2010

مُساهمةموضوع: رد: حوض الاوريق   الأربعاء 30 مايو 2012, 5:37 pm

سلااااااامات بأهلي من جده آبادول وياسر
تعرف ياخوي ياسر انا بصراحة لما لقيت كلامك الطاعم ده (حوض الاوريق) وهذه الخواطر الدسمه وشبعت منه
حتي التخمه .. قلت بالمره كمان شرك بالتأكيد واقع فيه آبادول ودي نصيحه ليك ولاتتعب تفتش ليه ..اي كلام من
الزمن الجميل تلقاه اول من وقع حضورا .. عبدالرحمن نصر الدين - بعد سنتين فتح حلة الأوريق وجيت أنا بالريحة (حلة كشي بو) لكن الحمد الله الرزق ما بفوت سيدو
عبدالرحمن - خلي لي شوية .. نقشها بحتة (تميسة) ما عندنا خمورية بكة

ياسر فؤاد قربت تعال لقيت درب للبوست بتاعك.. ياخي اخوك ماهر يقول اتخيلت حلة الاوريق وخموريه بكه وانت تقول (كشي بو) يعني خربت للراجل مزاجو
وبعدين وين ناس هناية ديل .. بالله عليك اذا قعدت تشرح ليهم في خموريه بكه وحله كشي بو مابيقولوا عليك مجنون
بالله خليكم قريبين
نكتة الرباطابي ابدااااع ابدااااع الناس ديل باين مابيفتشوا الكلام



[ندعوك للتسجيل في المنتدى أو التعريف بنفسك لمعاينة هذه الصورة]


[ندعوك للتسجيل في المنتدى أو التعريف بنفسك لمعاينة هذه الصورة]



[ندعوك للتسجيل في المنتدى أو التعريف بنفسك لمعاينة هذه الصورة]


الرجوع الى أعلى الصفحة اذهب الى الأسفل
ماهر عابدين دياب
 
 


الموقع : لندن
عدد المساهمات : 2905
تاريخ التسجيل : 02/05/2010

مُساهمةموضوع: رد: حوض الاوريق   السبت 02 يونيو 2012, 5:07 pm

صدقوني الحلة لو ما قعدت يومين وبقت كشي بو ماتكون طاعمة
رايكم شنو ياجماعة لو عملنا مطبخ زمان (علي وزن المطبخ الايطالي)
بس ماتقولوا لي نلقا الشرموط وين والكبر وين؟ والخمورية وين؟والقرقريبة وين؟ والبسدي وين؟وووووو...الخ
ممكن نشتغلوا الحكاية خيال بس
قولوا يالطيف
الرجوع الى أعلى الصفحة اذهب الى الأسفل
قرشى شيخ ادريس
 
 


الموقع : الولايات المتحده
عدد المساهمات : 974
تاريخ التسجيل : 28/03/2010

مُساهمةموضوع: رد: حوض الاوريق   الأحد 03 يونيو 2012, 12:29 am

ابن عمى العزيز
عدت الى لوحتك هذه والتى رسمتها بالكلمات والمفردات لتعبر عن زمن جميل عشناه
عدت الى هذه اللوحه وأنا عائد من قريتى التى هزمت فيها المدنيه لا أقول القيم لكن البساطه وفى كل شىء.
أخى ياسر أكتب ووثق لهذه الأحاسيس الجميله والنبيله وأنثرها فى منتدانا
حتى تصبح حيه فى الوجدان والشعور.
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الأحد 03 يونيو 2012, 7:02 am

استاذنا/
مرحب بيك /الشرموط والكبر والخموريه والقرقريبه والبسدي
سوف يضلون الطريق الي المطبخ ... بس لو قلت ليهم التكل.... بيتكم بيتكم بيتكم
حتلقاهم عرفو الاتجاه الحقيقي
وكمان مرحب يا استاذنا
الرجوع الى أعلى الصفحة اذهب الى الأسفل
ياسرابراهيم
 
 


عدد المساهمات : 466
تاريخ التسجيل : 24/01/2010

مُساهمةموضوع: رد: حوض الاوريق   الأحد 03 يونيو 2012, 7:16 am

قرشى شيخ ادريس كتب:
ابن عمى العزيز
عدت الى لوحتك هذه والتى رسمتها بالكلمات والمفردات لتعبر عن زمن جميل عشناه
عدت الى هذه اللوحه وأنا عائد من قريتى التى هزمت فيها المدنيه لا أقول القيم لكن البساطه وفى كل شىء.
أخى ياسر أكتب ووثق لهذه الأحاسيس الجميله والنبيله وأنثرها فى منتدانا
حتى تصبح حيه فى الوجدان والشعور.

ابن عمي الغالي

وأنا عائد من قريتى التى هزمت فيها المدنيه لا أقول القيم لكن البساطه[/color]
[/color]
عنوان كبير لحاله عامه للبلد عموما يا ابومحمد واسئله كثيره تدور في مخيلتك
وانت تدخل بيوت البلد وتمرق وتتجول في شوارعها وتستمع وتتونس مع الناس
زمان ولا هسه ؟؟؟ ناس زمان ولا ناس هسه؟؟؟ بيوت زمان ولا هسه؟؟؟؟؟
ونسه زمان ولا هسه؟؟؟؟ انا ولا هم ؟؟؟؟
وعندما تفتر من المشوار والاسئله تحس انك وقفت في نفس المكان والزمان
الذي تركت فيه البلد لتعود اليوم وتجد كل تحرك في اتجاه فلا تدري اي اتجاه
تسير

[color=darkred]وأنا عائد من قريتى التى هزمت فيها المدنيه لا أقول القيم لكن البساطه[/color]

اكتر حاجه بتعجبني انك بتكتب وانت عارف موقع كرعين جيدا
سلامات واشواق والله كتيره والزمن الجميل الذي عشاناه هو ما يوثق رباط المحبه
بيننا مهما ضربنا في ارض البعاد
الرجوع الى أعلى الصفحة اذهب الى الأسفل
 
حوض الاوريق
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 2انتقل الى الصفحة : 1, 2  الصفحة التالية

صلاحيات هذا المنتدى:لاتستطيع الرد على المواضيع في هذا المنتدى
شبكة مراغه الأصاله والتاريخ ::  القسم الثقافى -
انتقل الى: