ماذا حل برابطة ابناء مراغه بالجامعات والمعاهد العليا؟؟

تسلم ي خال ان شاء الله م حتكون اخر مشاركه لكن م اظن تكون في اهم منها

سلامات صهيب انت اليوم طرحت موضوع مهم و نسني كلام الحاج عبد الرحمن بتواجدك اليوم

بالخرطوم نشط الرابطة بمساعدة أستاذ محمد جعفر و باقي الشباب و صفحات الشبكة ستكون أكبر عون

لكم لنشر كل مايتعلق بالرابطة .

سلامات ياصهيب انت واحد من اعضاء الرابطه برضو يعني لما ينزل موضوعك المفروض تقول انا زاااااااااتي كنت منهم وين ياربي

الرابطه توقفت لاسباب كتيرة وبوضوح شديد منها:
اولا : الدعم المعنوي المالقوهو من الاهالي والكبار ودي كانت اول ضربه قاضيه لاطراف الرابطه يعني بدل شباب مانافعين وماعملو وكسلانين المفترض كان نسمع شئ اخر ودعم معنوي باللسان ماطلبنا بالمال والكلام دا قلتو في وسط حشد تكوين الهيئه وكررتها محتاجين الدعم المعنوي وبطلو تقولو رابطه شنو وحيعملو شنو وشباب كسلان .

ثانياً : البيت الجامع للطلبه وتكرار طلبهم بمبنى يلمهم ويسهل نشاطاتهم فوق مبنى الدار ممكن اعرف المانع شنو انو يتعمل طابق فوق يشمل الطلبه ويكونو تحت عيونكم على الاقل بدل مامشحترين ويوم في الجامعه ويوم ما اكلو ويوم لافين منتظرين وقت النوم يجي عشان قاعدين عند فلا عشان مايزعجهم وماتقولو لي ناس الخرطوم فتحو بيوتهم للطلبه ورحبو بيهم لانو مهما كان القادم من البلد ماحياخد راحتو الكاملة وكانو بيتو حيعمل حساب اي شي يقولو يعملو . جرجرة جرجرة تحبو الجرجرة وهسي حتقولو وافقنا بعد خلاص الناس مسكه خوفه انو يمشو يقيفو قدام النادي الام او لجنة او هيئه عشان يطلبو شئ اول شئ يقولو هسي انتو عملتو شنو يخلينا نديكم كدي ابدو اعملو ( جنس غايتو استغفر الله )

ثالثا : المحل اللي في لسوق الشعبي البقولو ليهم استفيدو منو محل في مكان عشوائي يستفيدو منو في شنو كدي ادوهم مقترحات دراسات عملتوها انتو الكبار القبلنا مسكتو لييييييه محلكم دا فاضي لي فشل ورونا عشان مانرجع نفشل ونكون ضيعنا زمن جيبو مقترحات جديدة .

رابعا : الجريدة انا عن نفسي كنت معتبراها المصدر الوحيد للدخل للرابطه لانو الطلبه بعملو الف حساب قبل يجو يقيفو قدامكم ويقولو نحنا محتاجين كداا افضل ندبر امونا برانا ولا شنو الزول يلف يتعب بلا تحصيل الجريدة وقفت لانو في ثلاثه شهور في بس 6 مواضيع وصلتني فقط . لو عندكم علاج للموضوع دا ادوني لسته وارقام تلفونات جديدة ممكن تكتب مواضيع !؟ عندكم؟؟

وللبقيه لي عودة

السلام عليكم جميعا اعضاء رابطة ابناء مراغة بالجامعات والمعاهد العليا اريد فقط توصيل معلومة لرئيس رابطة ابناء مراغة ولا ادري من هو حتي الان ولا ادري هل ستصل رسالتي هذه ام لا لاني داخل عبر هاتف والمهم هو بان الرابطه لديها كشك مبني ومسقف ومقفل باب حديدي ضلفتين بالسوق الشعبي دنقلا وحالته مزيرية من دخول الناس به واستعمال خاطئ وبالصدفة وبينما اصلح عربتي بالقرب من ذلك الدكان سالني احدهم بابن اجد رقم رئس رابطة ابناء مراغة وحكي لي بان هذا الدكان يتبع الرابطة وهنالك من بريد ايجاره وصيانته لان موقعه بقلب السوق قلت له خش الشبكة وارفع كلامك قال لا خلاص انا بتصرف ولا ادري هل اتصرف ام اتصرف رئيس الرابط ع العموم هذا ما حدث والامر مرفوع لمن يهمهم الامر والله الموفق

ممكن واحد من الرابطه يضع رقمه في الحائط او لافته هناك او يشغلوه