مابين دكتاتورية ودالشريف ومشاريع الجعلى الهامة

الاخوة الاكارم .... متعكم الله بالصحة والعافية .....

والله المنتدى والشبكة عملت تطور كبير واهداف سامية ربنا يوفق الجميع ..... ودة عمل ناجح نجاح كبير .... بس بعض الملاحظات نحب نطرحها للنقاش الهادى :

1.0 لابد من تكليف بعض المداومين بصورة يومية او شبة يومية بمراغة بعمل اعلام وتنوير بالموقع والمنتدى بمراغة ( فى الجامع .... فى الاماكن العامة وخاصة الكبار) لانو فى ناس لليوم مابعرفو العنوان شنو ؟؟؟؟ وللاسف قبل يومين فى نقاشات هيئة مراغة فى ناس نحن معولين عليهم كتير قالو انهم لايعرفو المنتدى ومتين عملو وهو شنو زاتو ؟؟؟؟ ااااااااااااا خ خ خ خ خ .... يعنى جهد بتاع اكتر من سبعة شهور شى بسيط ينسفو ...يعنى ممكن نعمل ملصقات تحمل اسم العنوان وتلصق قدام المساجد والمدارس والاماكن العامة .... يعنى حملة اعلامية...

واقترح ان يقوم الاخ سيف عبدالرحمن والنور ادريس بهذة المهمة من بحرى والاخ شاكر ابراهيم طة وقدورة الاصلى بقبلى .... بعد توافق عليهم ادارة المنتدى وتكلفم رسمى ..... فقط ينورو الناس انو فى حاجة اسما منتدى مراغة واهدافا كدة وكدة وكدة والتكريم والكيان وصيانات النادى التمت والمدارس وغيرو كلو بسبب هذة الشبكة مش من اجل الشكر والعرفان بل لفت الانتباه لاهميتها والتفاعل معها .... وتوطيد وتاكيد فكرة العمل الجماعى وروح الفريق ....

2.0 نقل المواضيع التى تتعلق بالمنتدى الثقافى والموجودة فى المنتدى العام .... وياريت المنتدى العام والمشاريع الهامة يحوى كل مايتعلق بمراغة والحراك الحالى (دعم مرضى .... زواج .... هيئة ....فلوجة .... غيرو ).

3.0 جلد السيد ودالشريف جلد مبرح لانو لحدى الان لم يرد على موضوع دعم المرضى وناشدناها 3 مرات ورسلنا ليهو ايميل وكررنا عبر عدة بوستات عديدة .... (طبعا الجلد دة لو الادارة والاعضاء وافقو كلهم ))) ... وبعدين تورونا تحركاتو وسفرو دة بمشى وين اصو .... مش حفير وشمشرة مننا لكن لانك بقيت شخصية اعتبارية مش ودالشريف اخو كرمبة داك ..... وعشان مانطلق عليك االدكتاتور ....

4.0 محاولة لعمل بعض الاحصائيات .... مثلا عدد طلاب الاساس .... عدد طالبات الاساس .... نسبة الشباب مقارنة بالكبار .... المساحات المزروعة .... عدد السواقى ومساحاتها .... يعنى ننتقل شوية للعلمية والدراسات لانو المرحلة الجاية لابد من رسم خطط اولا وياريت ياريت ماننفذ شى من غير خطة ..... يعنى حكاية البرنامج يخلق نفسو دى والكانت بتهيج عبيد عطا وترفع لى ضغطو يادوب فهمناها ..... وحكاية فتشو زبير يوسف وين بعد المغرب للكشافة لازم تبقى دقة قديمة ... (وسريع الحقنا ياوجيه) .... شايفك بتجهز عشان تدخل شبكة مراغة بقوة .... وفقك الله فى كل خطواتك ....

5.0 محاولة الانتقال من محطة المحلية والتعاون مع منتدى دنقلا ومواقع الولاية الشمالية الاخرى .....

6.0 عمل خطة سنوية .... يعنى السنة دى نخطط حنعمل لشنو ؟؟؟؟ والسنة الجاية مفترض شنو .... مثلا 2010 التكريم والهيئة والترابط الاجتماعى ....2011 الزواج الجماعى والتعاون مع المواقع الاخرى على الشبكة العنكبوتية ....

7.0 التفكير الجادى فى عمل محو امية التقنية ان شاء نشوف رجل اعمال ولا زول عندو مقدرة مالية يعمل معهد خاص بمراغة وبرسوم رمزية .... ودعم نادى الوحدة بعدد مقدر من اجهزة الكمبيوتر ....

8.0 موضوع الاطفال وماداراك ما الاطفال .... الصور الحلوة ديك دايرن نغرس فيها روح الفريق من هسة ودى مهمت كل زول فى اسرتو الصغيرة .... يعنى بدل واحد يمشى الدكان نرسل الاتنين سوا .... لو ماشين الحديقة ننتظر للجمعة عشان العندو امتحان نرجاهو ونمشى سوا .... الصلاة يصلو سوا .... اللعب يتلمو يلعبو سوا ....

ختاما زى ماقال باقر عكاشة وكرر فى كل الاجتماعات .... منتدى مراغة جسم قادم كالموج عشان كدة من الافضل الانسجام معة ...

قرشى ودالزين .... لا اسكت الله صوتا لك :::::::::

تحياتى وتقديرى
مجدى حسن

باشمهندس نتفق معك فى كل ماذكرت.
فقط المطلوب نقل هذا الموضوع الى المنتدى.
لأنو حقيقه لو ما معلن عنو ماكنا شفناهو.

قرشى : اظن قاصد ننقلو للمنتدى العام
لكن دى مشكلة ودالشريف انو اى موضوع لازم ينزل فى حتتو الصحيحة .... عشان المنتدى العام شحم شديد
بعدين يامالك الارشيف لسة مانزل .... لسة شغال فيهو ؟؟؟؟ البتاع دة مهم شديد لانو فيهو ارشيف المنتدى القديم
اللى عبيد عطا قال داير يقرا كل كبيرة صغيرة فاتت عليهو وبعدين يجينا حنا .....

عدد المساهمات : 200 تاريخ التسجيل : 10/02/2010

الاخ العزيز \ مجدي هندسه

ياخي كلامك دا مية مية ..... لكن بس كيف تقنع لينا النور ود السلطان (النونو) ...... لانو حردان ......

وشكلو خاشي الغابة .... وزايغ من العمل العام.........وبعدينك حكاية التنوير بالمنتدي انا شايف انو الناس كلها عارفة بالقصة دي.... والدليل انو حسين عابدين طوالي بالموبايل شابكني انا خاشي الموقع وما بعرف شنو ...... وعامل لي فيها ابعرام..........

الحاجة التانية المواضيع لمن تبقي عملية التنوير بكون افضل ...... كيف ؟ ايووووووووا سألتني كيف .... طيب ..... يعني ذي ما قلته مثلا في النادي نجيب لينا اربعة خمسة اجهزة ونوصل النت ونكون جمعية اسمها جمعية اصدقاء المنتتدي بمراغة.......

ونطلع طوف في مراغة كلها ونعلمهم كيفية التعامل مع الانترنت والموقع بصورة خاصة...... وصدقني لو عملنا رسوم رمزية الناس ما عندها مشكلة ..... وعلي مسئوليتي ....... الجمعية تكون عندها اهداف .......

الحاجة الاخيرة يا حبيبنا سامحو ود الشريف بس المرة دي ...............

................................... والله الموفق

كلامك تمام ياقدرو لكن المشكلة لحدى الان فى ناس كبار ماعارفين الحاصل .... ناس حسين وحمادة ارباب بقو شرسين فى الشبكة العنكبوتية .... لكن المشكلة فى الكبار الماحيسمعو بيها الا فى جنينة جوزيف يوم الموتمر الجامع .....

النور كل يوم بياكد للجعلى وللشباب انو هو نخرط بنفس هادى .... ويكفى ياخ حضور لتمرين الفريق قبل ايام .... قال انا فى ميدان الوحدة .... تانى شنو ؟؟؟؟؟ ........ حكاية (النونو) دى رسلى لى فى الايميل سريع ..... الزول دة اسمو ودالسلطان ياخ .....

السيد مدير منتدى مراغة - فرع شبكة مراغة

ماقنا (طبعا الجلد دة لو الادارة والاعضاء وافقو كلهم) ههههههههههههه ... ودة مستحيل يحقق لانو ماحتلقو كل الناس يوافقو خاصة وانو اليومين ديل الصمت لايعبر عن الرضا بل يعبر عن الزعل والقهر كمان ............ ياخ ورينا رايك توافق ولا ماتوافق على هذة المقترحات ودمت عزيزنا ودالشريف ...

عدد المساهمات : 299 تاريخ التسجيل : 28/02/2010

حقيقه سعدنا نحن فى المنتدى بصحبه اخوه واخوات كثر لو لا المنتدى لا ما التقينا بهم وتحدثنا معهم
الاخ ود الشريف بقا الذول لو ماكتب فى المنتدى العام موضوعوا مابيعرفوا دى مسشكله كبيره جدا
الاخ بكرى والاخ مالك نامل ان تكون هنالك خطه لانشاء مركز كمبيوتر بمراغه للفائده وذلك بتنسيق مع الكيان
الاخ مجدى اجسست ان ود الشريق رضخ لطلبك
الدعوه للجميع لتكريم الابطال الثلاثه لمجهودتهم حيال المنتدى
نقترح اقامه مكتب تنفيذى للمنتدى وهذه فكره تداولانها ليله امس شخصى وهيثم عبد القادر ومجدى حسن
نسال الله التوفيق والسداد

الاخوه الافاضل لكم العتبى حتى ترضوا جميعا
مجدى من ناحية الجلد جاهزين ومافى اي مشاكل
وبالنسبة لجميع اقسام المنتدي دي طبعا يتوقف عليكم وعلى حسب الموضوع البينزل من سعادتكم وفى القسم المخصص له
يعني يامجدي ما ممكن موضوع يخص النادي نقوم ننزلو فى العام او الاسلامي تمام و الشي التاني فى ناس كتيره جدا من الخارج و الداخل بدخلوا الشبكة واذا واحد دخل الشبكة ولقى الامور جايطه كدا بكون حسنا انشال يوقلو الناس ديل عاملين شبكة كبيرة كدا وما عارفين ينسقوا الشبكة تبقى مصيبة يا شباب .

ملاحظة -
الترتيب مهم جدا جدا بالنسبة للمواضيع وفى كل الاقسام وانتم نحن واثقون منكم ان تكتبوا مواضيعكم التى سوف تكون محل تقديرنا واحترامنا فى المكان المخصص .
يعني المنتدي عبارة عن مكتبة ضخمة جدا والاحسن الترتيب ثم الترتيب و التنظيم للمواضيع من البداية حتى لا يقلنا فى المستقبل وما عايزين نوقف المنتدى بسبب الترتيب وليس دكتاتورية .

الاخى الجعلى حكاية لجنة تنفيذية للمنتدى دى انساك منها فى الوقت الحالى .... هسة الهيئة امورا انتهت تقول لجنة
ولجنة ولجنة ولجنة ..... اخشى لو قنا ليك اعمل لينا فتة للفطور حتقول نعمل لجنة اولا ....هههههههههههه ... ماقنا ليك كل مشاكلنا فى اللجنة واللجنة المنبثقة والفرعية وممثلين اللجنة ........ ووووووووواااااااا

الهيئة جسم كبير حيستوعب اى مسمى والسلام

ودالشريف حمد الله على السلامة ........ ترتيب المواضيع نتفق تماما مع التنسيق والتنظيم

بس باقى المقترحات ياريت تناقشوها باستفاضة ودة كلو مجرد راى ودمت زخرا لنا ....... وكترو الريالات و .........

مجدى حسن كتب:

7.0 التفكير الجادى فى عمل محو امية التقنية ان شاء نشوف رجل اعمال ولا زول عندو مقدرة مالية يعمل معهد خاص بمراغة وبرسوم رمزية .... ودعم نادى الوحدة بعدد مقدر من اجهزة الكمبيوتر ....

قدورة الاصلي كتب:

في النادي نجيب لينا اربعة خمسة اجهزة ونوصل النت ونكون جمعية اسمها جمعية اصدقاء المنتتدي بمراغة.......

الأخوة والأخوات الأعزاء العضو الهميم مجدى وعضونا المختفى دائما قدورة
تحياتى لكم جميعا حيثما كنتم

قبل دقائق من إكتشافى لهذا البوست وأنا أقوم بترتيب المواضيع داخل المنتدى كنت على إتصال هاتفى مع الأخ شاكر
لأن الأخ مجدى لم يجب على الهاتف والأخ الجعلى مسجل إختفاء عن الساحة إلا فيما ندر.
الفكرة هى أن نقيم دورة تدريب لتعليم الحاسوب هنا فى نادى مراغه بالخرطوم
وانا شخصيا متبرع بالتدريس مجانا فى حال الحوجة لى كما اننى على إستعداد لتوفير جهاز لإستخدامه فى الدورة حتى نهايتها وحاليا انا أسعى فى محاولة أن أجد مركز معترف به ليدعمنا بشهادات لطلابنا بعد إتمام الدورة ليصبح الموضوع رسمى فأرجو الدعوة لى بالتوفيق فى هذه الخطوة.
ومن هنا أدعو باقى الأخوة فى المنتدى لفعل المثل وذلك بالتبرع مؤقتا بأجهزة حاسوب فقط حتى إنتهاء الدورة ويتم إعادتها لهم .
كما أدعو كل من يجد فى نفسه المقدرة أو لديه الملكة على التدريس أن يتقدم ويتبرع ليدرس ومجانا ..
وليجعل الله جميع أعمالكم فى ميزان حسناتكم؟
وفى حال نجاح الفكرة يمكن محاولة تطبيقها فى مراغه خصوصا وأن مراغه الأن تمتلك عدد عشرة أجهزة تم التبرع بها.
أرجو تدارس مقترحى هذا وإفادتى وذلك لأهمية الموضوع.

تحياتى لكم ودمتم سالمين

عمي العزيز منير...

الفكرة رائعة... اقترح عمل دراسة جدوي مبسطة وسريعة لادارة نادي مراغة بالخرطوم

إبن أخى العزيز تحياتى لك
بعد إتصالات هاتفبه مع الأخ مجدى وهيثم
إتضح أن الموضوع فعلا تم طرحه للنقاش أثناء مبادرة الأخ عبدالرحيم لجمع الشمل والتواصل التى أقيمت بالنادى
وقد إتفقو على هذه الفكرة ولكنها لم توضع موضع التنفيذ بعد وكل ماعلينا فعله الأن هو حث الناس للتبرع بالأجهزة مؤقتا
للبدء فى خطوات العمل الفعلى بعد الإستئذان والتواصل لتنسيق الأمور مع الأخوة المسؤلين فى النادى وهو ماسأقوم به غدا إن شاء الله وسأفيدكم بمجريات الأمور هنا على نفس البوست.
تحياتى لك ودمت سالما

الاخوة منير وماهر السلام عليكم ورحمة الله وبركاتة ....

نشكرك الاخ منير على المتابعة والبيان بالعمل
قدم هذا الطلب خلال لقاء الجمعة بالنادى العم مختار احمد بخيت

وكنا فقط فى انتظار خطوتك هذة
بالامس اتصلت بالعزيز سعادتو وديدى وهو يوم الجمعة حيعمل ان شاء الله تنوير فى النادى بخصوص الدورة
والعم مختار والعم كمال صباحى والجعلى من اوئل كشف الدارسين ونامل المزيد

الاخ منير انا على استعداد بالتدريس وتوفير لابتوب فى كل فترة مسائية
فقط نريد ترتيب دقيق لهذا الامر
لانة ذو فائدة عظيمة ولم للشمل وعمل اجتماعى كبير
سوف يحيى ليالى النادى

ايضا حاول اعمل اعلان لانو الناس بيقرو المنتدى العام ويمرقو بس

الحمد للة والشكر للة ومزيدا من الخطوات العملية ....

تحياتى
مجدى

الأخ العزيز باشمهندس منير والأخ العائد مجدى لكم التحيه.
خطوات عمليه ومفيده نتمنى التوفيق والسداد.

عدد المساهمات : 102 تاريخ التسجيل : 03/01/2011

الاخوة الاعزاء سلام
الموضوع محتاج خطوة عملية للتنفيذ ودار مراغة بالخرطوم بيت الجميع ويسعهم ومرحب باي مشروع يخدم اهل مراغة ويقوي اواصر المحبة والالفة
وعلي استعداد لبذل وتقديم اي خدمة متي ما طلب منا ذلك

الاخ عثمان عبدالرحيم (هولاكو)... عودتك اسعدتنا ونامل التواصل وعدم تكرار مثل هذا الانقطاع الطويل...
وانت مدير دار رابطة مراغة بالخرطوم اسعدنا ترحيبك

» مابين تطرف قرشى وبرود ذنورين وعقلانية العم بكرى كلمات فى حق منتدى مراغة
» مابين منتدى مراغة والفيس بوك
» مابين المنتدي والـــ facebook
» مابين قرنق والحلو والبشير...تشابه البقر
» محاربة الفساد مابين الجديه وذر الرماد على العيون.